آکسیجن کے بعد دہلی میں پانی کی قلت!

نئی دہلی:
دہلی کو کورونا وبا کے ساتھ اب گہرے پانی بحران کا سامنا کرنا پڑرہاہے۔ دہلی کے تینوں واٹر ٹریٹمنٹ پلانٹوں اب اتنا پانی نہیں ہے جتنے سے پوری دہلی میں آسان طریقے سے پانی کی فراہمی جاری رہ سکے ۔ دہلی جل بورڈ کے وائس چیئرمین راگھو چڈھا نے ہریانہ کے وزیر اعلیٰ منوہر لال کھٹر سے اپیل کی ہے کہ وہ جتنا جلد ہو سکے جمنا میں کافی پانی چھوڑ وائیں نہیں تو دہلی کے اندر گھروں میں تو دور اسپتال میں بھی واٹر سپلائی ملنا مشکل ہو جائے گا۔ ہریانہ نے جمنا میں دہلی کے لیے جلد کافی پانی نہ چھوڑا تو قومی راجدھانی میں پینے کے پانی کی سپلائی مکمل طور پر بند ہوجائے گی۔
راگھو چڈھا نے ہفتہ کو کہا کہ جمنا ندی میں پانی کا سطح گھٹنے سے دہلی کے کئی حصوں میں پینے کے پانی کی کمی گئی ہے۔ آنے والے دنوںمیں شہر کے اسپتالوں پر بھی اس کا اثر پڑ سکتا ہے۔ انہوں نے سی ایم منوہر لال کھٹر سے کورونا وبا کی اس بحران کی گھڑی میں دہلی والوں کی مدد کرنے کی اپیل کی ہے۔
چڈھا نے کہاکہ وزیر آباد تالاب کا پانی سطح 674.5فٹ معمول کے بجائے 667.20فٹ پر آگیا ہے ۔ جمنا میں کم ہوئے پانی سطح کی وجہ سے تینوں واٹر ٹریٹمنٹ پلانٹ وزیر آباد ، اونلا اور چندرول کے اندر پانی کی پیدا وار میں کم ہوگیا ہے۔ جس کی وجہ سے پوری دہلی میں کئی رہائشی علاقوں میں پانی کی فراہمی کم ہوگئی ہے۔ آنے والے دنوں میں اس کااثر دہلی کے اسپتالوں پر بھی پڑ سکتا ہے۔