علاج کی عدم دستیابی کے سبب مریض اسپتال کے باہر دم توڑ رہے ہیں، سی ایم یوگی کو بی جے پی لیڈر کاخط

کانپور:
کانپور سے بھارتیہ جنتا پارٹی (بی جے پی) کے رکن پارلیمنٹ ستیہ دیو پچوری نے گزشتہ روز اتر پردیش کے وزیر اعلیٰ یوگی آدتیہ ناتھ کو ایک خط لکھتے ہوئے کورونا کی تیسری لہر کے بارے میں ایک مشورہ دیا ہے۔ تیزی سے بڑھتے ہوئے کورونا انفیکشن کے پیش نظر پچوری نے یوگی سے ضلع انتظامیہ اور محکمہ صحت کے عہدیداروں کو کووڈ- 19 وبا کی تیسری لہر کے اندیشہ کے سبب پہلے سے ہی تیاری کرنے ہدایت دینے کی اپیل کی ہے۔
پچوری نے ایک خط لکھا ہے جس میں اس اندیشہ کااظہار کیاگیا ہے کہ کووڈ- 19 وبائی امراض کی ایک تیسری لہر بھارت میں آسکتی ہے جو نسبتاً زیادہ خطرناک ہوگی۔ ممبرپارلیمنٹ نے کانپور ضلع میں کووڈ 19-کے مریضوں کو ٹھیک علاج نہ ملنے کا ذکر کرتے ہوئے کہا کہ مریضوں کو وقت پر علاج نہیں پا رہا ہے اور وہ اپنے بھر، ایمبولینس یا اسپتالوں کے باہر دم توڑ رہےہیں۔ کووڈ 19-وبا کی پہلی لہر کے مقابلے دوسری لہر میں زیادہ لوگوں کی موت ہورہی ہے۔
پچوری نے خط میں کہا ہے کہ حکومت کو تیسری لہر کی پیشگی تیاری کرنی چاہئے۔ طبی عملہ ، پیرا میڈیکل اسٹاف ، آکسیجن ، دوائیں اور ویکسینیشن کا مناسب بندوبست کرنا ہو گا تاکہ کووڈ- 19 وبا کی تیسری لہر میں لوگوں کو مشکلات کا سامنا نہ کرنا پڑے۔ رکن پارلیمنٹ نے وزیر اعلیٰ سے درخواست کی ہے کہ وہ عہدیداروں کے ساتھ میٹنگ کر کے تیسری لہر سے پہلے اس سے نمٹنے کے پختہ انتظام کریں ۔ انہوں نے کہاکہ وہ یہ محسوس کرتےہیں کہ ہر کسی کو وبا کے دوران طبی سہولیات ملنی چاہئے۔