قاری سید محمد عثمان منصورپوری بھی اپنے سایہ شفقت سے محروم کر گئے

دیوبند:

ازہر ہند دارالعلوم دیوبند کے سینئر استاذِ حدیث ومعاون مہتمم، جمعیۃ علماء ہند کے صدر، امیرشریعت اور شیخ الاسلام حضرت مولانا حسین احمد مدنیؒ کے داماد مولانا قاری سید محمد عثمان منصورپوری کا آج یہاں مختصر علالت کے بعد انتقال ہوگیا۔ وہ گزشتہ پندرہ دنوں سے بیمارتھے اور گروگرام کےمیدانتال اسپتال میں زیر علاج تھے اور وہیں ان کا انتقال ہوا۔
بہت ہی عظیم المرتبت انتہائی شفیق ومحسن استاذ اور بے مثال مربی و سرپرست ، بلند پایہ عالم دین اور محدث دارالعلوم دیوبند اور جمعیۃ علماء ہند کے مخلص خادم ،قوم و ملت کے متاع گراں مایہ امیر الہند نمونہ اسلاف، حضرت اقدس مولانا قاری سید محمد عثمان صاحب منصورپوری ( نور اللہ مرقدہ ) نہایت پاکیزگی اور دیانت و امانت کے ساتھ76 سال تک ایک مثالی ، اصولی اور بے داغ زندگی گزارکر آج بروز جمعہ 21 مئی 2021 نماز جمعہ کے وقت (دوپہر) اپنے سایہ شفقت سے محروم کرکے اپنے مالک حقیقی سے جاملے۔ انا للہ وانا الیہ راجعون ،
حضرت مولانا کے صاحبزادے مولانا مفتی محمد سلمان منصورپوری اورمفتی محمد عفان منصورپوری نے تمام حضرات سے عاجزانہ گزارش ہے کہ حضرت والد صاحب علیہ الرحمہ کے لئے دعاء مغفرت اور ایصال ثواب کا اہتمام کریں اور دعا کریں کہ باری تعالیٰ ہمیں ، ہماری محترم المقام والدہ محترمہ ،ہمشیرہ صاحبہ اور دیگر اہل خانہ کو صبر جمیل کی دولت سے سرفراز فرمائیں۔

مولانا سید محمود اسعد مدنی اور امیر الہند حضرت مولانا قاری محمد عثمان صاحب منصور پوری نوراللہ مرقدہ کے صاحبزادگان مولانا مفتی سلمان منصورپوری و مفتی محمد عفان منصورپوری قاری صاحب کے سفر آخرت کو حتمی شکل دینے میں منہمک ہیں۔ حضرت کے جسد خاکی کو پہلے جمعیۃ علماء ہند کے مرکزی دفتر آئی ٹی او لایا جائے گا اور پھر وہاں سے دیوبند روانہ ہوگا۔

حضرت مولانا قاری سید محمد عثمان صاحب منصور پوری رحمہ اللہ کی پہلی نماز جنازہ عصر کے وقت "دفتر جمعیت” دہلی میں اور دوسری نماز "احاطہ مولسری” دارالعلوم دیوبند میں بعد نماز عشاء ادا کی جائے گی، تدفین "قبرستانِ قاسمی” میں ہوگی ان شاء اللہ.!