سنبھل ضلع کی چندوسی عدالت نے جمعرات (3 جولائی، 2025) کو شاہی جامع مسجد، سنبھل (جس کے بارے میں ہری ہر مندر ہونے کا دعویٰ کیا گیا ہے)، میں نماز ادا کرنے پر پابندی کی درخواست کی سماعت کے لیے 21 جولائی کی تاریخ مقرر کی
۔The Hinduکے مطابق درخواست میں اس کی "متنازعہ حیثیت” کا حوالہ دیتے ہوئے نمازوں کی ادائیگی پر پابندی کی درخواست کی گئی تھی ـ سول جج (سینئر ڈویژن) آدتیہ سنگھ نے سمرن گپتا کی درخواست کو ریکارڈ پر لے لیا۔تنازعہ پہلے الہ آباد ہائی کورٹ تک پہنچ گیا تھا، جہاں مسلم فریق نے مسجد کے احاطے کے سروے کے ماتحت عدالت کے حکم کو چیلنج کیا تھا۔تاہم، 19 مئی کو، ہائی کورٹ نے ٹرائل کورٹ کے فیصلے کو برقرار رکھا اور ہدایت کی کہ وہیں کارروائی جاری رکھی جائے۔درخواست گزار نے دلیل دی کہ چونکہ اس جگہ کو عدالت نے متنازعہ سمجھا ہے، اس لیے مسلمانوں کو بھی نماز پڑھنے سے روک دیا جانا چاہیے، جس طرح ہندوؤں کو عبادت سے روکا گیا ہے۔عرضی میں مسجد کو سیل کر کے سنبھل ڈسٹرکٹ مجسٹریٹ کی تحویل میں دینے کی درخواست کی گئی تھی۔
سمرن گپتا نے ہندو فریق کی جانب سے درخواست گزار بنانے کی بھی کوشش کی۔دونوں معاملات 21 جولائی کو سامنے آئیں گے۔اصل مقدمہ 19 نومبر 2023 کو آٹھ ہندو درخواست گزاروں نے دائر کیا تھا، بشمول ایڈوکیٹ ہری شنکر جین اور وشنو شنکر جین۔ اس دن مسجد میں عدالت کے حکم سے سروے کیا گیا۔سروے کا دوسرا دور 24 نومبر کو کیا گیا جس کے بعد معاملہ چندوسی سول کورٹ کے سامنے رکھا گیا۔ آخری سماعت 28 اپریل کو ہوئی تھی۔
ہندو فریق کی نمائندگی کرنے والے ایڈوکیٹ سری گوپال شرما نے پی ٹی آئی کو بتایا کہ مسلم فریق کی درخواست کو مسترد کرنے کا ہائی کورٹ کا حکم ریکارڈ کے حصے کے طور پر عدالت میں پیش کیا گیا تھا۔
دوسری جانب شاہی جامع مسجد کی نمائندگی کرنے والے ایڈووکیٹ قاسم جمال نے تسلیم کیا کہ فریق مخالف نے ہائی کورٹ کا فیصلہ جمع کرایا ہے اور کہا کہ مسجد کی قانونی ٹیم عدالت کے جو بھی حکم دے گی اس کی پابندی کرے گی۔ ایڈوکیٹ بابو لال سکسینہ، جنہوں نے نماز پر روک لگانے کی درخواست دائر کی، نے پی ٹی آئی کو بتایا کہ ان کی مؤکل محترمہ گپتا کا خیال ہے کہ کسی بھی گروپ کی طرف سے مذہبی سرگرمیوں کو متنازعہ مقام پر اس وقت تک روکنا چاہیے جب تک کہ کوئی حتمی فیصلہ نہیں ہو جاتا۔ اس معاملے میں سنبھل میں 24 نومبر 2024 کو مسجد کے مقام پر دوسرے سروے کے دوران پرتشدد جھڑپیں ہوئیں۔
