قبائلی کامن سول کوڈ کے دائرے سے باہر رہیں گے: مرکز کی یقین دہانی

مرکزی اقلیتی امور کے وزیر کرن رجیجو نے اتوار کو کہا کہ شمال مشرق اور ملک کے دیگر خطوں کے قبائلیوں کو مجوزہ یکساں سول کوڈ (یو سی سی) کے دائرے سے باہر رکھا جائے گا تاکہ وہ اپنے نظام کے مطابق آزادانہ زندگی گزار سکیں۔ یہاں آر ایس ایس سے منسلک ونواسی کلیان آشرم کی طرف سے منعقد ایک پروگرام میں انہوں نے اس معاملے پر مرکزی حکومت کے موقف کو واضح کیا اور کہا کہ کچھ لوگ ان دنوں سوشل میڈیا پر عجیب ماحول بنا رہے ہیں اور مرکز کے خلاف بحث چھیڑ رہے ہیں۔
رجیجو نے کہا، ‘ایک مرکزی وزیر کے طور پر، میں اپنی حکومت کا موقف بتانا چاہتا ہوں۔ ہماری حکومت اور پارٹی (بی جے پی) آئین کے مطابق ملک میں یکساں سول کوڈ (لانے) کے بارے میں سوچ رہی ہے۔ جب فوجداری قانون سب کے لیے یکساں ہے تو پھر دیوانی قانون سب کے لیے کیوں نہیں ہونا چاہیے؟انہوں نے کہا کہ کچھ ریاستوں نے اس سلسلے میں کام شروع کر دیا ہے۔ وزیر نے کہا، ‘لیکن ہم نے واضح طور پر کہا ہے کہ قبائلیوں کو اس سے مستثنیٰ رکھا جائے گا۔ قبائلیوں کو اپنی زندگی اپنے طریقے سے گزارنے کی آزادی دی جائے۔ یہ (یکساں سول کوڈ) شیڈول 6، شیڈول 5، شمال مشرقی اور ملک کے دیگر قبائلی علاقوں میں لاگو نہیں ہوگا۔’