عمر خالد کے ساتھ ناانصافی:کپل سبل ،چندر چوڑ کو بنایا نشانہ

دہلی فسادات کیس کے ملزم عمر خالد کی درخواست ضمانت مسترد ہونے کے بعد سینئر وکیل کپل سبل سپریم کورٹ جائیں گے۔ سبل نے اسے ‘ناانصافی’ قرار دیا ہے۔ کیونکہ کل دہلی ہائی کورٹ نے عمر خالد اور شرجیل امام سمیت 10 ملزمان کو ضمانت دینے سے انکار کر دیا تھا۔سبل نے کہا کہ عمر خالد کی درخواست ضمانت کو مسترد کرنا آئین کے آرٹیکل 21 کی خلاف ورزی ہے۔  سبل نے ایک پریس کانفرنس میں کہا کہ ہم صحیح کام کرنے اور اس کے لیے آواز اٹھانے سے کتراتے ہیں۔ ہمارے وکلاء، متوسط طبقہ اور معاشرہ خاموش ہے۔ انہوں نے سوال کیا کہ ہندوستان کی جمہوریت کس سمت جارہی ہے جب سیاسی جماعتیں اس طرح کے مسائل کو یہ سوچ کر اٹھانے سے گریز کرتی ہیں کہ اس سے ان کی سیاست کو نقصان پہنچ سکتا ہے۔
سبل نے سابق چیف جسٹس ڈی وائی چندر چوڑ کے مبینہ بیان کو بھی نشانہ بنایا ہے۔ جس میں انہوں نے کہا تھا کہ خالد کے وکلاء نے سپریم کورٹ میں کم از کم سات بار سماعت ملتوی کرنے کی درخواست کی تھی۔ سبل نے واضح کیا کہ سپریم کورٹ میں اس معاملے میں صرف دو بار التوا طلب کیا گیا تھا۔
ہائی کورٹ نے عمر خالد اور شرجیل امام کی ضمانت منظور نہیں کی۔
دہلی ہائی کورٹ نے منگل کو فروری 2020 کے فسادات سے متعلق یو اے پی اے کیس میں عمر خالد، شرجیل امام سمیت 10 ملزمان کو ضمانت دینے سے صاف انکار کردیا۔ جسٹس نوین چاولہ اور شلیندر کور کی ڈویژن بنچ نے نو ملزمان کی ضمانت کی درخواستیں مسترد کر دیں، جب کہ جسٹس سبرامونیم پرساد اور جسٹس ہریش ویدیا ناتھن شنکر کی بنچ نے تسلیم احمد کی درخواست کو مسترد کر دیا۔ فسادات میں 53 افراد ہلاک اور 700 سے زائد زخمی ہوئے تھے۔