کے سی تیاگی کا جے ڈی یو سے رشتہ ختم؟ اگلی منزل آر ایل ڈی یا سنیاس ؟

کیا جے ڈی یو سے ممتاز لیڈر کے سی تیاگی کا برسوں پرانا تعلق ٹوٹ جائے گا؟ کیا تیاگی اپنی پارٹی سے کنارہ کشی کے بعد نئی پارٹی میں شامل ہوں گے؟ اگر این ڈی ٹی وی کو موصول ہونے والی معلومات درست ثابت ہوتی ہیں تو ان تمام سوالوں کا جواب ہاں میں ہوگا۔ ذرائع کے مطابق راشٹریہ لوک دل (آر ایل ڈی) نے کے سی تیاگی کو پارٹی میں شامل ہونے کی دعوت دی ہے۔ بدھ کی صبح آر ایل ڈی کے قومی جنرل سکریٹری ملوک نگر نے کے سی تیاگی سے ملاقات کی۔ جے ڈی یو کی طرح آر ایل ڈی بھی فی الحال بی جے پی زیرقیادت این ڈی اے کا حصہ ہے
کے سی تیاگی آر ایل ڈی میں شامل ہوں گے؟کے سی تیاگی نے ابھی تک آر ایل ڈی کی پیشکش کا جواب نہیں دیا ہے، لیکن یہ خیال کیا جاتا ہے کہ وہ آنے والے دنوں میں اس تجویز پر کوئی فیصلہ کر سکتے ہیں۔ ملوک ناگر نے تیاگی کے ساتھ ملاقات کو غیر سیاسی قرار دیا، لیکن انہوں نے یہ کہا کہ اگر تیاگی پارٹی میں شامل ہوتے ہیں، تو یہ مغربی اتر پردیش میں پارٹی کی سماجی بنیاد کو مضبوط کرے گا، کیونکہ اس علاقے میں کے سی تیاگی کی برادری کے لوگوں کی کافی تعداد ہے۔ ملوک ناگر نے این ڈی ٹی وی سے بات کرتے ہوئے کہا کہ تیاگی جی کو پارٹی میں شامل کرنے کا فیصلہ پارٹی صدر جینت چودھری کریں گے۔
مغربی یوپی سے خاص تعلق ہے۔
مرکزی وزیر جینت چودھری آر ایل ڈی کے صدر ہیں۔ ان کے دادا، چودھری چرن سنگھ، ملک کے وزیراعظم تھے، اور ان کے والد، چودھری اجیت سنگھ، مرکزی وزیر تھے۔ آر ایل ڈی کی حمایت کا مرکز مغربی اتر پردیش میں ہے، جو اتفاق سے کے سی تیاگی کی آبائی ریاست بھی ہے۔ 1989 میں پہلی بار کے سی تیاگی جنتا دل کے ٹکٹ پر ہاپوڑ لوک سبھا سیٹ سے ایم پی منتخب ہوئے تھے۔
جے ڈی یو میں رہیں گے یا ـــــ؟
ابھی تک جے ڈی یو کی طرف سے کے سی تیاگی کے خلاف کوئی تحریری یا رسمی کارروائی نہیں کی گئی ہے، لیکن پارٹی کے بیان سے معلوم ہوتا ہے کہ پارٹی میں ان کی مسلسل موجودگی انتہائی مشکل ہو گئی ہے۔ اس ہفتے جب کے سی تیاگی کی لکھی ہوئی کتاب کا اجراء کیا گیا تو جینت چودھری مہمان خصوصی تھے۔ جینت چودھری نے کہا تھا کہ ہر پارٹی کو کے سی تیاگی جیسے لیڈروں کی ضرورت ہے۔