نئی دہلی:( آر کے بیورو) دہلی کے احتجاجی مقام جنتر منتر پر غزہ کے ساتھ اظہارِ یکجہتی اور اسرائیل کے وحشیانہ اور جارحانہ اقدامات کی مذمت کے لیے انسانی سروں کا سیلاب اُمڈ آیا دہلی اور قرب و جوار سے ہزاروں افراد نے مظاہرے میں شرکت کی ۔ مظاہرے میں شریک افراد نے غزہ میں فاقہ کشی اور بھکمری پر گہری تشویش کا اظہار کیا اور خبردار کیا کہ غزہ پر اسرائیلی فوجی یا سیاسی کنٹرول قائم کرنے کی کوئی بھی کوشش محصور علاقے میں جاری انسانی بحران کو مزید سنگین بنا دے گی۔ مظاہرین نے مختلف مسلم تنظیموں کے نمائندوں کی تقریروں کو بغور سنا اور درمیان میں فلسطینی عوام کے حق میں پرجوش نعرے لگائے
اس احتجاج میں بڑی تعداد میں عام شہریوں، طلباء، سماجی ، مذہبی، سیاسی رہنماؤں اور معروف سول سوسائٹی کے کارکنوں سمیت دہلی و اطراف کی ریاستوں سے مختلف مذاہب، طبقات ، سیاسی، سماجی و مذہبی تنظیموں سے وابستہ افراد کی بڑے پیمانے پر شرکت نے دنیا کو ایک مضبوط پیغام دیا کہ فلسطین کا مسئلہ صرف مسلمانوں کا مسئلہ نہیں ہے اور فلسطین کے ساتھ یکجہتی صرف مسلم سماج تک ہی محدود نہیں ہے بلکہ بھارت میں امن اور انصاف سے محبت کرنے والے تمام لوگ فلسطین کے سا تھ کھڑے ہیں اور کھل کر اسرائیلی جارحیت کی مذمت کرتے ہیں۔
اس موقع پر مقررین نے اسرائیل کے وحشیانہ رویے کی شدید مذمت کی اورفلسطینیوں کے خلاف اس کے جارحانہ اقدامات کو نسل کشی قرار دیا۔ واضح رہے کہ اکتوبر 2023 سے اب تک تقریبا ایک لاکھ فلسطینی ، جن میں خواتین اور بچے بڑی تعداد میں شامل ہیں، شہید ہو چکے ہیں، اسرائیل کی جانب سے گھروں، اسپتالوں ، اسکولوں اور پناہ گزین کیمپوں کو منصوبہ بند طریقے سے نشانہ بنایا جارہا ہے۔ مظاہرین نے غزہ میں بھوک کی بڑھتی ہوئی صورت حال اور صحت و صفائی کے تمام وسائل کے تقریبا مکمل طور پر تباہ ہونے کی رپورٹوں کو بھی اجاگر کیا اور خبردار کیا کہ غزہ میں شدید قحط کا خطرہ پیدا ہوچکا ہے۔ مظاہرین نے فلسطین کے حوالے سے ملک کی نمایاں مسلم تنظیموں، سول سوسائٹی اور سرکردہ شخصیات کی جانب سے جاری کردہ مشترکہ بیان میں کیے گئے مندرجہ ذیل مطالبات کی پُر زور تائید کی :
(1) بین الاقوامی برادری اور عالمی طاقتیں فیصلہ کن اقدام کریں اور فوری جنگ بندی کو یقینی بنائیں۔
(2) فوری طور پر امدادی راہداریوں کو کھولا جائے تاکہ خوراک، پانی، ایندھن اور طبی امداد غزہ پہنچائی جا سکے۔
(3) بین الاقوامی برادری اور حکومتِ ہند کھل کر اسرائیل کے جارحانہ اقدامات کی مذمت کرے اور اس کے ساتھ تمام فوجی اور اسٹریٹجک تعلقات معطل کرے۔
(4) عالمی طاقتیں اور حکومتِ ہند بین الاقوامی عدالت کی جانب سے اسرائیلی وزیرِ اعظم بنیامین نیتن یاہو کے وارنٹ گرفتاری کی حمایت کریں اور اقوامِ متحدہ کی جنرل اسمبلی کی جانب سے فلسطینی علاقوں پر اسرائیل کے غیر قانونی قبضے کے مکمل خاتمے اور ایک خودمختار آزاد ریاستِ فلسطین کے قیام کی حمایت کریں۔
(5) ہمارا ملک بھارت ہمیشہ سے ایک امن پسند ملک رہا ہے لہٰذا اسے مظلوموں کی حمایت کے اپنے دیرنہ موقف پر قائم رہنا چاہئے اور غزہ پر غیر قانونی اسرائیلی قبضے کے عزائم کے خاتمے کے لیے کی جانے والی بین الاقوامی کوششوں کی بھرپور حمایت کرنی چاہئے۔
(6) ملک بھر کی سول سوسائٹیز اور سماجی اداروں کی زمہ داری ہے کہ وہ عوام میں فلسطین کے حق میں بیداری مہم چلائیں، اسرائیلی مصنوعات کے بائیکاٹ کے لیے عوام کی ذہن سازی کریں اور پُر امن احتجاجی سرگرمیوں کو مزید تیز کریں۔ احتجاج کے دوران مسلم اکثریتی ممالک سے بھی اپیل کی گئی کہ وہ اسرائیل اور امریکہ پر فلسطین میں خونریزی کے خاتمے کے لیے اپنے اثرو رسوخ کا بھرپور استعمال کرے۔
اس اسرائیل مخالف احتجاج سے خطاب کرنے والوں میں
سید سعادت اللہ حسینی ، امیر جماعت اسلامی ہند ، مولانا حکیم الدین قاسمی،جنرل سیکریٹری، جمیعت العلماء ہند، پروفیسر اپوروا نند، دہلی یونیورسٹی ، پروفیسر وی کے ترپاٹھی، محمد ادیب ، سابق ممبر پارلیمنٹ ـ ایڈوکیٹ لارا جیسنگ، سینئر وکیل، بمبئی ہائی کورٹ، نشا سدھو، جنرل سیکریٹری، نیشنل فیڈریشن آف انڈین وومن (NFIW)، ضیاء الدین صدیقی، امیر، وحدتِ اسلامی، جناب رئیس الدین، قومی صدر، ویلفیئر پارٹی آف انڈیا (WPI)، مفتی عبدالرزاق، جنرل سکریٹری جمعیت العلماء، صوبہ دہلی، عبدالحفیظ، صدر، ایس آئی او (SIO)، شیخ نظام الدین، اسسٹنٹ جنرل سیکریٹری، ملی کونسل اور ملک معتصم خان،نائب امیر، جماعت اسلامی ہند وغیرہ قابل ذکر ہیں ندیم خان سکریٹری اے پی سی آر APCR نے پروگرام کی نظامت کی
