ممبئی:(ایجنسی)
مہاراشٹر کے وزیر اعلیٰ ادھو ٹھاکرے کے خلاف ’تھپڑ سے متعلق تبصرہ‘ کو لے کر مرکزی وزیر نارائن رانے کو پولیس نے گرفتار کرلیاہے ۔ رانے نے جولائی ماہ میں ہی نریندر مودی کی کابینہ میں مائیکرو ، مختصر اور درمیانے صنعتوں کے وزیر کا عہدہ سنبھالا ہے۔ پولیس ٹیم وزیر کو گرفتار کرنے کے لیے سنگمیشور گئی تھی۔ رانے 20 سال میں ایسے پہلے مرکزی وزیر ہیں، جنہیں گرفتار کیا گیا ہے ۔ رانے کی گرفتاری کاخدشہ اس وقت بڑھ گیا تھا جب گرفتاری سے تحفظ کے لیے ان کی جانب سے داخل کی گئی عرضی پر بمبئی ہائی کورٹ نے فوری سماعت سے انکار کردیا تھا۔ نارائن رانے نے وزیر اعلیٰ ادھو ٹھاکرے کے خلاف اپنے تبصرہ کو لے کر درج ایف آئی آر کو چیلنج دیتے ہوئے منگل کو بمبئی ہائی کورٹ میں عرضی دائر کرکے گرفتاری پر روک لگانے کی اپیل کی تھی، لیکن کورٹ نے عرضی پر فوری سماعت سے انکار کردیا۔
وکیل انیکیت نکم کے ذریعہ داخل رانے کی عرضی میں ایف آئی آر منسوخ کرنے کی ہدایت دینے کی اپیل کی گئی ۔ جسٹس ایس ایس شندے اور جسٹس این جے جمدار کی بنچ کے سامنے داخل عرضی میں منگل کو ہی فوراً سماعت کی مانگ کی گئی تھی، حالانکہ بنچ نے اس پر سماعت کرنے سے انکار کردیا اور کہاکہ (عرضی کا ) ذکر کرنے کی اجازت نہیں ہے ۔ بنچ نے کہا تھا کہ وکیل کے طریقہ کار پر عمل کرنا ہوگا۔
مرکزی وزیر رانے کی گرفتاری پر رد عمل ظاہر کرتے ہوئے بی جے پی کے ترجمان سمبت پاترا نے کہا کہ نارائن رانے کا جومعاملہ ہے سنگین ہے، کچھ الفاظ نارائن رانے نے استعمال کیے ہوں گے ، اس سے بچا جا سکتا ہے ۔ مہاراشٹر میں 42 میں آئے 27 ایسے وزیر ہیں جن پر کیس ہے ۔ انل دیشمکھ پر 100 کروڑ وصولی کا الزام ہےکیا وہ جیل میں ہے؟ انل پارکھ کو پولیس پوچھتی بھی نہیں ہے۔ آج مہاراشٹر میں جمہوریت شرمسار ہوئی ہے۔ سنجے راوت نے خواتین کے خلاف کئی بیان دئے لیکن کوئی ایف آئی آر درج نہیں ہوئی ۔
خیال رہے کہ مرکزی وزیر نارائن رانے نے رائے گڑھ میں پیر کے روز منعقد کی گئی جن آشیرواد یاترا کے دوران کہا تھا کہ ’’یہ شرمناک ہے کہ وزیر اعلیٰ (ٹھاکرے) کو یہ معلوم نہیں ہے کہ آزادی کو کتنے سال ہو گئے ہیں۔ تقریر کرنے کے دوران وہ پیچھے مڑ کر اس کے بارے میں پوچھتے نظر آتے ہیں۔ اگر میں وہاں ہوتا تو انہیں ایک زوردار تھپڑ رسید کرتا۔‘‘
نارائن رانے نے دعویٰ کیا ہے کہ 15 اگست کو عوام الناس سے خطاب کے دوران ادھو ٹھاکرے یہ بھول گئے تھے کہ آزادی کو کتنے سال ہو گئے ہیں۔ انہوں نے کہا کہ تقریر کے دوران ہی انہوں نے اپنے معاونین سے دریافت کیا کہ آزادی کو کتنے سال ہوئے ہیں۔
ادھر، بی جے پی نے وزیر اعلیٰ ادھو ٹھاکرے کے خلاف مرکزی وزیر نارائن رانے کے تھپڑ والے بیان کو خارج کر دیا ہے۔ ساتھ ہی، حزب اختلاف کے لیڈر دیویندر فڈنویس نے کہا کہ پارٹی نارائن رانے کے ساتھ مضبوطی سے کھڑی ہے اور ادھو ٹھاکرے حکومت بی جے پی لیڈران کو نشانہ بنانے کے لئے پولیس کا غلط استعمال کر رہی ہے۔
