بنگلہ دیش نے کہا، عدالت نے حکم دیا تو بھارت سے شیخ حسینہ کی واپسی کا مطالبہ کریں گے۔

ڈھاکہ: عبوری سرکار کے مشیر امور  خارجہ توحید حسین نے کہا ہے کہ اگر اس حوالے سے عدالتی حکم جاری ہوا تو سابق وزیراعظم شیخ حسینہ کو واپس لانے کی کوشش کی جائے گی۔ اتوار کو وزارت خارجہ میں صحافیوں سے بات کرتے ہوئے، انہوں نے کہا کہ بھارت کے ساتھ حوالگی کا ایک معاہدہ موجود ہے، جس میں تجویز کیا گیا ہے کہ اس کی واپسی کو محفوظ بنانا ممکن ہے، لیکن اس بات پر زور دیا کہ اس میں قانونی عمل شامل ہے۔
ڈھاکہ ٹریبیون کے مطابق انہوں نے کہا "اگر ہمارا قانونی نظام ان کی واپسی کوضروری سمجھتا ہے، تو ہم یقینی طور پر انہیں واپس لانے  کے لیے ہر ممکن کوشش کریں گے۔” آیا بھارت اس درخواست کو مانے گا یا نہیں، یہ مکمل طور پر ان پر منحصر ہے۔جب حسینہ واجد  سے ان کے سرخ پاسپورٹ کی منسوخی کے بعد ہندوستان میں ان کی موجودہ حیثیت کے بارے میں پوچھا گیا تو انہوں نے کہا: "آپ کو اس بارے میں ہندوستانی حکام سے پوچھنا چاہیے۔”
ہندوستان کے ساتھ دو طرفہ معاہدوں کے بارے میں مشیر نے کہا کہ ہندوستان کے ساتھ ہونے والے کسی بھی معاہدے میں بنگلہ دیش کے مفادات کو ترجیح دی جائے گی۔
انہوں نے اس سوال کا جواب دیا تھاکہ آیا گزشتہ اپریل میں بنگلہ دیش اور ہندوستان کے درمیان ریل رابطے سے متعلق مفاہمت کی یادداشت (ایم او یو) پر نظرثانی کی جائے گی۔ انہوں نے کہا:  "ایم او یو کوئی رسمی معاہدہ نہیں ہے؛ اس لیے، ہم اس بات کا جائزہ لے سکتے ہیں کہ آیا ہمارے مفادات کا مناسب طور پر تحفظ کیا گیا ہے اور، اگر ضروری ہو تو، ایک باضابطہ معاہدے پر بات چیت کر سکتے ہیں جو اس بات کو یقینی بنائے کہ ہمارے مفادات کا تحفظ کیا جائے۔”
بھارت-بنگلہ دیش تعلقات کی موجودہ حالت پر تبصرہ کرتے ہوئے، توحید حسین نے بھارت کے مثبت موقف کو تسلیم کیا لیکن ساتھ ہی بھارت کی لائن آف کریڈٹ سے مالی اعانت سے چلنے والے منصوبوں کی سست پیش رفت کو بھی نوٹ کیا۔انہوں نے تاخیر کی وجہ کسی بھی انقلابی صورتحال کے بعد ممکنہ رکاوٹوں کو قرار دیا اور کہا کہ بنگلہ دیش میں سیکورٹی کی صورتحال بہتر ہوئی ہے۔انہوں نے کہا کہ "ہم نے حالات کو قابو میں کرنے میں کامیابی حاصل کر لی ہے۔ جیسے جیسے حالات مستحکم ہوں گے، ہم توقع کرتے ہیں کہ ان منصوبوں پر کام کرنے والے ماہرین محفوظ محسوس کریں گے اور جاری منصوبوں کو مکمل کرنے کے لیے واپس لوٹیں گے۔”