بریلی:
بریلی میں 2 معصوم بچے تقریباً 3 دنوں تک اپنے باپ کی لاش کے ساتھ رہ رہے تھے اور جب انہیں بھوک برداشت نہیں ہوئی تو پڑوسی کے گھر کچھ کھانے کو مانگنے گئے تو لوگوں کو معلوم ہواکہ ان کے باپ کی موت ہوچکی ہے۔ بیوی شوہر سے جھگڑا کرنے کے بعد ناراض ہو کر میکے چلی گئی تھی ۔
آن لائن ہند ی پورٹل ’آج تک ‘کی تفصیلی رپورٹ کے مطابق بریلی کے تھانہ عزت نگر علاقہ کے بیریئر ون چوکی کے گائتری نگر میں ایک شخص کی مشتبہ حالت میں پھانسی پر لٹکی ہوئی لاش ملنے سے سنسنی پھیل گئی۔ شخص کی لاش دو تین دن پرانی لگ رہی تھی۔معلوم ہونے پر پڑوسیوں نے پولیس کو اطلاع دی۔
لاک ڈاؤن میں گھر آیا تھا نوجوان
پولیس ٹیم نے موقع پر پہنچ دیکھاتو نوجوان کی لاش پھانسی کے پھندے پر لٹکی ہوئی تھی۔ پڑوسی کے مطابق متوفی منوج نوئیڈا کی ایک کمپنی میں کام کرتا تھااور لاک ڈاؤن لگنے سے گھر پر رہتا تھا۔ پڑوسیوں نے ساتھ ہی یہ بھی بتایا کہ متوفی کی ایک 4 سال کی بیٹی اور 6 سال کا بیٹا ہے۔
منوج کی بیوی سے لڑائی ہوئی تھی ، جس کے بعد وہ بچوں کو چھوڑ کر اپنے میکے چلی گئی تھی۔ گھر میں منوج اپنے دو بچوں کے ساتھ رہ گیا تھا، منوج کے پڑوسی نے بتایاکہ اس کے بچوں نے آکر کہاکہ وہ تین دن سے کچھ نہیں کھایا وہ بہت بھوکے ہیں اور ان کے پاپا مر گئے ہیں تو ان کو واقعہ کا علم ہوا۔
پولیس نے لاش کو قبضہ میں لے کر تلاشی لی تو اس کے پاس سے کوئی بھی سوسائڈ نوٹ نہیںملا۔ پولیس نے لاش کا پنچنامہ بھر کر پوسٹ مارٹم کو بھیج دیا۔ پولیس کا کہنا ہے کہ بادی النظر میں بیوی سے ناراضگی کے سبب پھانسی لگا لینے کا معاملہ لگ رہاہے ۔ پولیس معاملہ کی جانچ کررہی ہے اور ایس ایس پی روہت سجوان کا کہنا ہے کہ اگر کوئی شکایت آتی ہے تو اس کی جانچ کی جائے گی۔
