اسلام آباد :(ایجنسی)
پاکستان کے وزیر اعظم عمران خان کا کہنا ہے کہ روس کا دورہ کرنے پرطاقتور ملک ناراض ہوگیا، کیا حکومت ہٹانے کے لیےکوئی ملک کسی ملک کو دھمکی دے سکتا ہے،ہماری غلطی ہے ہم نے انہیں تاثر دیا کہ ہم آپ کے بنا زندہ نہیں رہ سکتے۔
اسلام آباد میں 2 روزہ سیکورٹی ڈائیلاگ کی افتتاحی تقریب سے خطاب کرتے ہوئے عمران خان نے کہا کہ بھارت پابندیوں کے باوجود روس سے تیل خرید رہا ہے۔ انہوں نے کہا کہ برطانوی وزیرخارجہ نے کہا بھارت کی آزاد خارجہ پالیسی ہے ،مداخلت نہیں کرسکتے، وہ آزاد ملک ہے توپھر ہم کیا ہیں؟
عمران خان نے کہا کہ اچکنیں سلوانے والے کہہ رہے تھے کہ ہمیں امریکا کو ناراض نہیں کرنا چاہیے۔ان کا کہنا ہے کہ منی لانڈرنگ کی بڑی وجہ مجرموں کو سزائیں نہ ملنا ہے۔ عمران خان نے کہا کہ غریب ملک کے کرپٹ لوگ پیسہ باہر لے جاتے ہیں، مخصوص طبقہ عوام کو آگے نہیں بڑھنے دیتا۔
دھمکی آمیز مراسلے سے متعلق الزامات میں صداقت نہیں: وائٹ ہاؤس
ترجمان وائٹ ہائوس کاکہناہےکہ دھمکی آمیز مراسلے سے متعلق الزامات میں صداقت نہیں،امریکی محکمہ خارجہ کے ترجمان نیڈ پرائس کاکہناہےکہ پاکستان کےآئینی عمل کا احترام کرتے ہیں،صورتحال کا جائزہ لے رہے ہیں۔دھمکی آمیز الزامات میں’’کوئی سچائی‘‘ نہیں ،ہم پاکستان میں ہونے والی پیش رفت کوباریک بینی سے دیکھ رہے ہیں، ہم پاکستان کے آئینی عمل کا احترام اور قانون کی حکمرانی کی حمایت کرتے ہیں۔
قبل ازیں ، نمائندہ جنگ؍جیو کے سوالات کے جواب میں امریکی محکمہ خارجہ کے ترجمان نے عمران خاں کی تقریر کے ختم ہونے کے بعد بھیجی گئی ای میل میں سوالات کا مختصر جواب دیتے ہوئے کہا کہ ان الزامات میں کوئی صداقت نہیں، پاکستان کی داخلی صورتحال پر پوچھے گئے سوال کے جواب میں کہا گیاکہ ہم صورتحال کا بغور جائزہ لے رہے ہیں۔
وزیراعظم کے دورہ روس کے تناظر میں پاکستان کے موجودہ سیاسی بحران کے بارے میں ایک سوال کے جواب میں امریکی محکمہ خارجہ کے ترجمان نے کہا کہ امریکا پاکستان کے آئینی طریقہ کار اور قانون کی بالادستی کے اُصول کا احترام اور حمایت کرتا ہے۔
عمران کے عوامی طور پر امریکا پر سازش کا الزام عائد کرکے نہ صرف امریکا میں آباد پاکستان کمیونٹی کیلئے بھی مسائل پیدا کردیئے ہیں بلکہ امریکا میں قائم پی ٹی آئی کےارکان کیلئے بھی امریکا دشمنی کے قوانین کو متحرک کیا جاسکتا ہے جبکہ امریکا میں آباد پاکستانیوں نے عمران خان کی پارٹی تحریک انصاف اور شوکت خانم اسپتال کیلئے نہ صرف کئی ملین ڈالرز کے فنڈز اور عطیات بھی فراہم کیے ہیں۔
پاکستانی وزیراعظم عمران کے ان الزامات سے انہیں پاکستان میں عوامی سطح پر ہونے والا فائدہ یا نقصان بھی سامنے آنا ہے لیکن امریکا اور یورپی سطح پر پاکستان کی سفارتکاری اور پاکستان کے امیج کو نقصان پہنچنے کا امکان ہے،تجارتی، معاشی، سفارتی اور پاکستان کے امیج کیلئے مشکلات و مسائل کو جنم ملے گا۔
عدم اعتماد کامیاب ہو بھی جائے، مرداروں سے شکست نہیں مانیں گے: شیخ رشید
وفاقی وزیرِ داخلہ شیخ رشید کا کہنا ہے کہ اتوار کو وزیرِ اعظم عمران خان کے خلاف عدم اعتماد کامیاب بھی ہو جائے لیکن ان مُرداروں سے شکست نہیں مانیں گے۔راولپنڈی میں ایک تقریب سے خطاب کرتے ہوئے وفاقی وزیرِ داخلہ شیخ رشید نے یہ بات کہی۔انہوں نے کہا ہے کہ ذمے داروں سے کہتا ہوں کہ روزوں کے بعد انتخابات ہونے چاہئیں۔
وفاقی وزیرِ داخلہ شیخ رشید نے کہا کہ ملک میں صاف شفاف انتخابات کی ضرورت ہے۔ان کا کہنا ہے کہ جو لوگ ووٹ لے کر بِکے ہیں وہ انتخابات میں جا کر اپنے لوگوں کا سامنا کریں۔وفاقی وزیرِ داخلہ نے مزید کہا کہ میں زندہ رہوں یا مرجاؤں یہ یاد رکھنا کہ راولپنڈی اس وقت تعلیم میں ایک نمبر پر ہے۔ انہوں نے یہ بھی کہا ہے کہ راولپنڈی کی ترقی کے لیے لوگوں کے نخرے تک اٹھانے پڑے ہیں۔