لکھنؤ :
اترپردیش میں بلاک پرمکھ الیکشن کے لئے پرچہ نامزدگی کے آخری دن لکھیم پور کھیری میں ایک شرمناک واقعہ سامنے آیا ہے۔ بی جے پی کارکنوں نے ضلع کےپسگاؤں بلاک میں ایس پی امیدوار ریتو سنگھ کا بی جے پی کارکنوں نے پرچہ داخل نہیں ہونے دیا۔ الزام ہے کہ بلاک میں داخل ہورہیں سماج وادی پارٹی کی امیدوار کے ساتھ بی جے پی کے کارکنوں نے مار پیٹ اور بدسلوکی بھی کی اور ان کی ساڑی بھی کھینچی ۔
حامی بی جے پی کی قومی صدر اور دھورہرا سے ممبر پارلیمنٹ ریکھا ورما کے رشتہ دار بتائے جارہے ہیں اس واقعہ کے سامنے آنے کے بعد کانگریس کی قومی جنرل سکریٹری پرینکا گاندھی اور ایس پی کے قومی صدر اکھلیش یادو نے نظم ونسق پر سوال کھڑا کرتے ہوئے سرکار پر شدید حملہ بولا ہے ۔
کانگریس کی یوپی انچارج پرینکا گاندھی واڈرا نے اس معاملے سے منسلک ایک ویڈیو ٹویٹ کرتے ہوئے یوگی اور مودی حکومتوں پر حملہ بولا۔ پرینکا نےاپنے ٹویٹ میں سی ایم اور پی ایم سے 4 سوال کئے ہیں۔
واضح رہے کہ یوپی کے لکھیم پور کھیری ضلع کے پسگاؤں بلاک میں بلاک پرمکھ الیکشن میں زبردست ہنگامہ ہوا۔ سماج وادی پارٹی امیدوار ریتو سنگھ کا پرچہ نامزدگی بی جے پی کے کارکنوں نے نہیں داخل ہونے دیا۔ بلاک میں داخل ہو رہیں امیدوار کی پیشکش انتیا کو سڑک سے کھینچ لیاگیا۔ ان کے ساتھ مار پیٹ ہوئی۔ اس کے بعد ایس پی کے سابق ضلع صدر کرانتی کمار سنگھ کو گیٹ سے کھینچ لائے۔ ان کو یرغمال بنانے کی کوشش کی گئی۔
اترپردیش کے سابق وزیر اعلیٰ اکھلیش یادو نے لکھیم پور واقعہ پر یوگی حکومت پر حملہ کرتے ہوئے واقعہ کی ویڈیو ٹویٹ کی ہے۔ انہوں نے کہا ہے کہ بی جے پی انتخابات جیتنے کے لئے خواتین کی توہین کرنے پر آمادہ ہے۔ اکھلیش نے ویڈیو میں شامل لوگوں کو یوگی کے غنڈے کہہ کر مخاطب کیا ہے ۔
ایس پی کا الزام ہے کہ آر او کے سامنے اندر گھسے بھاچپائی پرچہ نامزدگی چھین لے گئے اور پھاڑ دیا۔ امیدوار کو بھی پیٹا گیا۔ اس کے کپڑے پھٹ گئے۔ یہ سب پولیس کے سامنے ہوا۔ الزام ہے کہ پولیس نے کسی فسادی کو روکنے کی کوشش نہیں کی۔ اس سے پہلے ایس پی امیدوار کی کار کو راستے میں بی جے پی کے لوگوں نے گھیر لیا۔ بعد میں پہنچی پولیس امیدوار کو بلاک کی بجائے تھانہ لے گئی۔ اس درمیان 3 بج گئے اور ایس پی امیدوار کا پرچہ داخل نہیں ہو سکا۔
حالانکہ لکھیم پور کھیری کے علاوہ یوپی کے سیتا پور، امبیڈکر نگر ، مئو ، جون پور اور فتح پور اضلاع میں بی جے پی اور ایس پی کارکنوں کے درمیان جم کر تصادم ہوا۔ سیتا پور میں تو کئی راؤنڈ فائرنگ ہوئی ۔فتح میں پولیس کو لاٹھی چارج کرنا پڑا ۔ لکھیم پور کھیری میں ایس پی امیدوار کے ساتھ بدسلوکی ہوئی۔ زیادہ تر اضلاع میں ہنگامے کے بعدہی پرچہ داخل ہوپایا۔
اترپردیش میں ضلع پنچایت صدور کے انتخاب کے دوران حزب اقتدار اور اپوزیشن کے درمیان کئی مقامات پر پرچہ نامزدگی داخل کرنے کو لے تنازع ہواتھا۔ اس معاملے کو لے کر ایس پی کے کچھ امیدواروں نے کورٹ کی پناہ لے لی ہے ۔ انہوں نے کورٹ سے اپیل کی ہے کہ پرچہ نامزدگی کا عمل پورا کرنے اور اس دوران سیکورٹی دینے کا انتظام کیا جائے ۔ اس عرضی پر کورٹ نے سرکار کو حکم دیا ہے کہ وہ انتخابی عمل پورا کرنے اور امیدواروں کو سیکورٹی دینے کو یقینی بنائے ۔
