نئی دہلی :
کورونا وائرس کے معاملے ایک بار پھر بڑھ رہے ہیں ۔ زیادہ تر متعدی ڈیلٹا ویرئنٹ کی وجہ سے ملک ہی نہیں بلکہ دنیا بھر میں انفیکشن کے زیادہ کیس رپورٹ ہورہے ہیں۔ بھارت کے لیے تشویش اور بھی زیادہ ہے کیونکہ وزارت صحت کے مطابق گزشتہ چار ہفتوں میں سات ریاستوں کے 22 اضلاع میں نئے کووڈ کیس میں اضافہ دیکھنے کو مل رہا ہے ۔ کیرل میں کورونا وائرس کے سب سے زیادہ نئے کیسز رپورٹ ہو رہے ہیں اور نئے (سیرو) سروے نے تشویش میں اضافہ کردیا ہے۔
بھارت میں گزشتہ 24 گھنٹوں کے دوران 43,509 کووڈ کیسز اور 38,465 ریکوری درج کی گئی ۔ فعال معاملوں کی تعداد 4,03,840 ہے اور صحت یابی کی شرح 97.38٪ تک جا پہنچی ہے۔
عالمی سطح پر بھی صورتحال ٹھیک نہیں ہے۔ ڈبلیو ایچ او کے مطابق 28 جولائی کو جہاں دنیا بھر میں 4.29 لاکھ کووڈ کیس رپورٹ ہوئے تھے، وہیں29 جولائی کو یہ تعداد 6.14 لاکھ پہنچ گئی ہے ۔
مرکزی حکومت نے جن 22 اضلاع کی نشاندہی کی ہے ان میں مہاراشٹر کے بیڈ اور سولا پور شامل ہیں۔ خشک سالی سے متاثر بیڈ میں پہلی لہر کے دوران انفیکشن کا زیادہ پھیلاؤ نہیں ہوا تھا۔ لیکن اس کے بعد سے ضلع میں 97,600 معاملے اور 2600 اموات درج ہوچکی ہے۔ بیڈ مہاراشٹر کے سب سے سست ویکسینیشن شرح والے علاقوں میں سے بھی ایک ہے ۔
اسی طرح سولاپور میں اب تک 185,000 کیسز اور 4800 اموات رپورٹ ہوچکی ہیں ۔ جولائی میں سولا پور میں پازیٹیو شرح 5.5-6فیصد تک پہنچ چکی ہے ۔
ملک میں کورونا کی صورتحال کیرل میں سب سے خراب ہے۔ ملک بھر میں کووڈ کے کل معاملوں کا 50 فیصد کیرل سے رپورٹ ہورہے ہیں ۔ گزشتہ دو دنوں سے ریاست میں 22,000سے معاملے سامنے آئےہیں۔ ریاست کے الانپوجھا ، کوٹئیم ، مالا پورم ، تھرشر ، وائناڈ ، ارناکلم اور پٹھانمیتھیٹا اضلاع میں تشویش کا موضوع بنا ہوا ہے ۔
وہیں شمال مشرقی ریاستوںمیں بھی کورونا تیزی سے بڑ رہاہے ۔ منی پور کے 5 اضلاع چنڈیل ، چیوراچند پور ، امپھال ایسٹ ، نونی اور تھوبل میں کورونا میں اضافہ ہورہا ہے۔ میگھالیہ کی ویسٹگاروہلس ، جنوب مغربی کھاسی ہلس اور جنوب مغربی گارو ہلس میں بھی انفیکشن میں تیزی آگئی ہے۔
اروناچل پردیش کے تین اضلاع اور آسام اور تریپورہ میں ایک ایک ضلع میں بھی کورونا کیسز میں اضافہ دیکھا گیا ہے۔
آئی سی ایم آر کے چوتھے سیرو سروے میں پایا گیا ہے کہ کیرل میں سیروپریویلینس سب سے کم 44.4فیصد پائی گئی ہے ۔ سب سے زیادہ سیرو پریویلینس مدھیہ پردیش میں 79 فیصد دیکھی گئی ہے ۔
آئی سی ایم آر نے 11 ریاستوں کے 70 اضلاع میں کووڈ اینٹی باڈی جانچ کے لیے چوتھا سیرو سروے کیا تھا، یہ سروے 14 جون سے 6 جولائی کے درمیان کیا گیا تھا۔ آسام میں 50.3فیصد اور مہاراشٹر میں 58فیصد سیرو پرویلینس دیکھا گیا ہے ۔
کورونا کےعالمی معاملے بڑھ کر 19.58کروڑ ہوگئے ہیں۔ اور اس وبا سے مرنے والوں کی تعداد بڑھ کر 41.8لاکھ ہوگئی ہے ۔ یومیہ آنے والے معاملوں میں تیزی آگئی ہے ۔ کورونا کا ڈیلٹا ویر ئنٹ امریکہ ، یو کے سے لے کر انڈونیشیا اور زمباوے میں ہونے والے انفیکشن میں اضافہ کا ذمہ دار مانا جا رہاہے ۔
اس ویرئنٹ کی وجہ سے امریکہ کو ویکسینٹیڈ لوگوں کو ماسک نہ پہننے کی ایڈوائزری میں تبدیلی کرنا پڑا ہے ۔ یہ ویرئنٹ 100 سے زیادہ ممالک میں پھیل چکا ہے ۔
ویتنام ، ملیشیا ، جاپان ، جنوبی کوریا جیسے کئی ایشیائی ممالک میں کورونا کنٹرول میں تھا ، لیکن اب ان ممالک میں کورونا نے زور پکڑ چکا ہے۔ اولمپکس کی وجہ سے جاپان کے دارالحکومت ٹوکیو میں کووڈ انفیکشن بہت تیزی سے بڑھ رہا ہے۔ ٹوکیو میں روزانہ کووڈ کے کیسز پہلی بار 3,000 کو عبور کرچکے ہیں۔
