لکھنؤ (ایجنسی)
ملک بھرسے لوگ اترپردیش کے سابق وزیر اعلیٰ اور رام مندر تحریک کے اہم لیڈروں میں شمار کئے جانے والے کلیان سنگھ کے آخری درشن کرنے کے لیے اترپردیش پہنچ رہے ہیں ۔ ادھر ایک تصویر پر کانگریس پارٹی کی طرف سے سوال کھڑے کئے گئے ہیں۔ تصویر میں دیکھا جا سکتا ہے کہ قومی ترنگے کے اوپر بی جے پی کے جھنڈے کو رکھا گیا ہے ۔
کانگریس لیڈر سرینواس بی وی نے تصویر کو ٹویٹ کرکے لکھا کہ کیا یہ صحیح ہے؟ نیو انڈیا میں ہندوستانی پرچم کے اوپر پارٹی کا جھنڈا لگانا ؟ ان کے ٹویٹ کے بعد سے سوشل میڈیا میں لوگوں میں غم وغصہ دیکھنے کو مل رہا ہے ۔ اشونی بگری نام کے ایک یوزر نے لکھا کہ ان پر کیس ہونا چاہئے ۔ ترنگے کے اوپر بی جے پی کا جھنڈا کیسے ہو سکتا ہے ؟ آئین میں قانون سب کے لیے یکسا ں ہوتا ہے ۔ پھر بی جے پی کے لیے کیوں نہیں؟ شردھا کماری نام کے ایک دیگر یوزر نے لکھا کہ یہاں بھی اپنے جھنڈے کی تشہیر ، کوئی موقع نہیں چوکتے۔ اپنی تشہیر کرنے کا ۔
واضح رہے کہ کلیان سنگھ کا ہفتہ کو انتقال ہو گیا تھا۔ وزیر اعظم نریندر مودی نے اتوار کو لکھنؤ پہنچ کر انہیں خراج عقیدت پیش کیا۔ انہوں نے کہاکہ پربھو رام کلیان سنگھ جی کو اپنے قدموں میں رکھے اور ان کے خاندان کو یہ نقصان برداشت کرنے کی طاقت دے۔ بھگوان رام ہر غمگین شخص کو تسلی دے جو یہاں اقدار ، نظریات ، ثقافتوں اور روایات پر یقین رکھتا ہے ، میں یہ پراتھنا کرتا ہوں۔ ‘ وزیر دفاع راج ناتھ سنگھ اور بی ایس پی (بہوجن سماج پارٹی) کی سربراہ مایاوتی نے بھی کلیان سنگھ کو خراج عقیدت پیش کیا۔
