لکھنؤ : (ایجنسی)
یوگی کابینہ کی توسیع رکشا بندھن کے بعد ہوگی۔ اسی کے ساتھ قانون ساز کونسل کے چار ارکان کی نامزدگی بھی ہوگی۔ جمعرات دیر رات مرکزی وزیر امت شاہ کی رہائش گاہ پر بی جے پی قومی صدر جے پی نڈا کی موجودگی میں ہوئی اعلیٰ سطحی میٹنگ میں کابینہ توسیع اور نامزدگی پر مہر لگ گئی ہے۔ کابینہ میں سابق نوکر شاہ اور بی جے پی کے پردیش صدر اروند کمار شرما، کانگریس چھوڑ کر بی جے پی میں آئے سابق وزیر جیتن پرساد اور نشاد پارٹی کے سنجے نشاد سمیت دیگر لیڈروں کو وزیر بنایا جاسکتا ہے ۔
قانون ساز اسمبلی کا مانسون سیشن ختم ہونے کے بعد وزیر اعلیٰ یوگی آدتیہ ناتھ جمعرات دیر شام دہلی پہنچے۔ بی جے پی پردیش صدر سوتنتر دیو سنگھ اور جنرل سکریٹری (تنظیم) سنیل بنسل بھی مغربی یوپی کے اضلاع کا دورہ کر کے دہلی پہنچ گئے۔ امت شاہ کی رہائش گاہ پر رات 8 بجے شروع ہوئی میٹنگ میں کابینہ توسیع اور قانون ساز کونسل کے ارکان کی نامزدگی پر منتھن ہوا ۔
