سرکا کی پالیسیاں عوام دشمن،سوشلسٹ پارٹی انڈیا کسان مورچہ کے ساتھ :سید تحسین احمد

‌نئی دہلی :
سوشلسٹ پارٹی انڈیا دہلی پردیش نے مہنگائی کے خلاف کسان مورچہ کی طرف سے لیے گئے فیصلوں کی مکمل تائید اور ہر طرح کے تعاون کا اعلان کیا ہے۔ پارٹی کی دہلی پردیش اکائی کے صدر سید تحسین احمد نے میڈیا کو جاری بیان میں کہا کہ کتنے شرم کی بات ہے کہ دیش کا کسان گزشتہ سات ماہ سے دھرنے پر بیٹھا ہے اور مودی سرکار ان کی طرف سے آنکھیں موندلی ہیں ان سے بات کرنے کو تیار نہیں،یہ غیر جمہوری رویہ ہے ۔

واضح رہے کسان مورچہ کی قیادت میں ملک بھر سے ہزاروں کسان تینوں زرعی قوانین کی منسوخی کے لیے غیر معینہ دھرنے پر بیٹھے ہیں۔مورچہ نے 8جولائی کو ایندھن کی بڑھتی قیمتوں کے خلاف ملک گیر احتجاج کا اعلان کیا ہے۔

سید تحسین احمد نے کہا کہ ان کی پارٹی کسانوں کے مطالبات کے ساتھ کھڑی ہے اور ان کے ہر قدم کی تائید و حمایت کرتی ہے۔انہوں نے کہا کہ اس وقت ملک کورونا کے بعداب مہنگا ئی کی گرفت میں ہے،عوام پر چہار جانب سے مہنگائی کی مار ہے، حالیہ دنوں میں ضروری اشیاء جیسے کھانے کا تیل،پٹرول ڈیزل،حتی کہ صابن،واشنگ پاؤ ڈر جیسی ضروری اشیاء کی قیمتوں میں 42فیصد تک اضافہ ہوا ہے۔انہوں نے مودی سرکار سے مطالبہ کیا کہ وہ کسانوں کے مطالبات مانے اور عوام دشمن پالیسیوں کو ترک کرکے لوگوں کو مہنگائی سے راحت دلا ئے۔