نئی دہلی :
عام آدمی پارٹی ’آپ‘ کے رکن پارلیمنٹ سنجے سنگھ نے الزام لگایا ہے کہ دہلی میں واقع ان کی سرکاری رہائش گاہ پر حملہ کیا گیا ہے۔ منگل (15 جون ، 2021) کو انہوں نے ٹویٹ کرکے ویڈیو پیغام کے ذریعہ اس بارے میں معلومات دیں۔
آن لائن ہندی پورٹل ’جن ستہ ‘ کی رپورٹ کے مطابق سنجے سنگھ نے ویڈیو شیئر کرتے ہوئے لکھا:’’ہمارے گھر پر حملہ ہواہے۔ چاہے میرا قتل کردو، مگر کان کھول کر سن لو بھاجپائیوں پربھو شری رام کے نام پر بننے والی مندر میں چندہ چوری نہیں کرنے دوںگا‘‘ اس درمیان انہوں نے ہندی نیوز چینل اے بی پی نیوز کو بتایاکہ ’ میرا گھر نارتھ ایونیو میں ہے۔ صدر ہاؤس سے محض 100 میٹر دو ری پر، یہاں حملہ اس لئے ہوا،کیونکہ میں نے رام مندر میں چندہ چوری سے جڑا مدعا اٹھایا۔ میں یہ چوری نہیں ہونے دوںگا۔ مجھ پر حملہ ہو یا کچھ اور… مگر میں ڈرنے والا نہیں۔ میں چندہ چوروں کو جیل بھیجوا کر دم لوں گا۔‘
سنگھ نے مزید دعویٰ کیا کہ حملہ آور رام مندر اسکینڈل کو لے کر ناراض تھے۔ وہ گھر کے باہر نعرے بازی بھی کررہے تھے۔ میں نے پہلے بھی ملیں دھمکیوں کو لے کر شکایتیں کی تھیں… مگر ان پر کوئی سنوائی نہیں ہوئی۔مجھے دھمکی دی گئی تھی کہ مٹی کا تیل ڈال کر زندہ جلا دیا جائے گا۔ چونکہ دہلی میں پولیس مرکز کے ماتحت ہے اس لئے دیکھ لیجئے کیا ہو رہا ہے، اگر سرکار کارروائی نہیں کرے گی تو میں ان چندہ چوروں کو جیل بھیجوا کر رہوں گا۔
سنجے سنگھ نے مزید کہاکہ ’ 48 گھنٹے (چندہ چوری سے جڑا مدعا اٹھایا)ہو گئے ، مگر کوئی کارروائی نہیں ہوئی۔ اس کے برعکس میرے گھر پر حملہ کردیا گیا۔ میری جانب سے شکایت کی جاچکی ہے ۔ پولیس والے کچھ لوگوں کو پکڑ کر لے گئی ہے، مگر کارروائی کی توقع نہیں ہے۔‘
وہیں نئی دہلی کے ڈی سی پی دیپک یادو نے خبر رساں ایجنسی اے این آئی کو بتایا ، سنگھ کی رہائش گاہ پر لگی نیم پلیٹ پر سیاہی لگانے کی کوشش کی گئی ۔ دو لوگ اس معاملے میں حراست میں لے گئے ہیں ۔حالانکہ کسی کو بھی چوٹ نہیں آئی ہے۔ فی الحال جانچ کی جارہی ہے ۔
کیا ہے پورا معاملہ ؟
بتادیں کہ’ آپ‘ کے راجیہ سبھا ممبر سنجے سنگھ اور پارٹی کے قومی ترجمان نے اتوار کے روز ایودھیا میں تعمیر ہونے والے شری رام جنم بھومی تیرتھ چھیتر ٹرسٹ میں بدعنوانی کے سنگین الزامات عائد کیے تھے ، اس کی جانچ سی بی آئی اور انفورسمنٹ ڈائریکٹوریٹ (ای ڈی) سے کرانے کی مانگ کی گئی تھی ۔
وہیں سماج وادی پارٹیکے سرکار میں کابینہ وزیر رہے اور ایودھیا کے سابق ایم ایل اے پون پانڈے نے بھی ایودھیا میں چمپت رائے پر بدعنوانی کے ایسے ہی الزام لگائے اور معاملے کی جانچ سی بی آئی سے کرانے کی مانگ کی تھی۔
