نئی دہلی:
کانگریس کے رکن پارلیمنٹ منیش تیواری نے دعویٰ کیا ہے کہ بی جےپی کی زیر قیادت مرکزی حکومت کے پاس سال 2024 سے پہلے لوک سبھا کے ارکان پارلیمنٹ کی تعداد 1000 یا اس سے زیادہ کرنے کی تجویز ہے ۔ انہوں نے کہاکہ ایسا کوئی بھی فیصلہ لینے سے پہلے عوامی بحث ہونی چاہئے۔
ایک ٹویٹ میں تیواری نے کہاکہ مجھے بی جے پی پارلیمانی ساتھیوں کے ذریعہ معتبر ذرائع سے مطلع کیا گیاہے کہ 2024 سے پہلے لوک سبھا کی تعداد 1000 یا اس سے زیادہ کرنے کی تجویز ہے ۔ 1000 سیٹوں والے نئے پارلیمنٹ ہال کی تعمیر جارہی ہے ۔ ایسا کرنے سے پہلے ایک سنجیدہ عوامی مشاورت ہونی چاہئے۔ ایک دیگر کانگریسی رکن پارلیمنٹ کارتک چدمبرم نے کہا کہ عوامی بحث کی ضرورت ہے ، ہمارے جیسے بڑے ملک کے لیے براہ راست منتخب کئے جانےوالے زیادہ عوامی نمائندوں کی ضرورت ہے ، لیکن اگر یہ اضافہ آبادی کی بنیاد پر ہوتاہے تو اس سے جنوبی ریاستوں کی نمائندگی مزید کم ہو جائے گی جو قابل قبول نہیں ہوگا۔
بتادیں کہ اس وقت لوک سبھا میں 543 اور راجیہ سبھا میں 245 ممبر ہیں،حالانکہ سرکار نے نئی پارلیمنٹ کی عمارت کی تعمیر کے بعد پارلیمنٹ میں عوامی نمائندوں کی تعداد بڑھانے کے اشارے دئے ہیں ۔
انڈیا ٹو ڈے کی رپورٹ کے مطابق دسمبر 2020 کے ایک انٹرویو میں لوک سبھا اسپیکر اوم برلا نے کہا تھا کہ یہ مان لیا جانا چاہئے کہ مستقبل قریب میں ممبران پارلیمنٹ کی تعداد میں اضافہ ہوگا ، کیونکہ کچھ لوک سبھا سیٹیں 16 لاکھ سے 18 لاکھ لوگوں کی نمائندگی کرتی ہے ۔ اوم برلا نے کہا تھا کہ ایوان زیریں میں جگہ کی کمی کی وجہ سے کئی ممبران پارلیمنٹ کو مشکلات کا سامنا کرنا پڑتاہے ۔ انہوں نے کہا تھا موجودہ وقت میں اگر تمام 543 ارکان پارلیمنٹ عمارت میں موجود ہیں، تو وہ تمام اسپیکر کے پوڈیم سے نظر نہیں آتے ہیں۔ کئی ممبران پارلیمنٹ ستون کے پیچھے دکھائی نہیں دیتے ہیں ۔ کئی ارکان پارلیمنٹ کو ستون کے پیچھے بھی بیٹھنا پڑتاہے ۔ وہ شکایت کرتے ہیں کہ ایسی صورت حال میں وہ ٹھیک سے (ایوان سے خطاب) نہیں کر پا رہے ہیں اور کام کرنے میں دشواریوں کا سامنا کرنا پڑرہا ہے ۔ ڈسک اور بیٹھنے کے مقام پر جگہ کی کمی ہے ۔
جدید ملٹی میڈیا مواصلات کے سازوسامان اور ووٹنگ کے نظام کی کوئی گنجائش نہیں ہے ۔ اوم برلا نے کہاکہ نئی پارلیمنٹ عمارت کے لوک سبھا میں 888 ممبران کے بیٹھنے کی صلاحیت ہوگی ، جس میں مشترکہ اجلاس کے دوران گنجائشکو بڑھا کر 1,224کرنے کا متبادل ہوگا۔ اسی طرح راجیہ سبھا میں 384 ممبران کے بیٹھنے کی گنجائش ہوگی ۔
