لکھنؤ :
مشہور شاعر منور رانا نے منگل کو میڈیا سے بات چیت میں اپنے قتل کئے جانے کا خدشہ ظاہر کیاہے۔ منور رانا نے رائے بریلی پولیس سے اپیل کرتے ہوئے کہاہے کہ میرے بھتیجے قتل کی سازش رچ رہے ہیں۔ وہ میری جان لے لیں گے۔ منور رانا نے کہاکہ اگر پولیس حرکت میں نہیں آئی تو میرا قتل ہوسکتا ہے ۔
بتادیں کہ پیر کے روز ہی منور رانا کے بیٹے تبریز رانا پر جان لیوا حملہ ہوا تھا ۔ پریوار کاالزام ہے کہ ان کی ایک 5.5 بیگھہ جاندانی زمین کو لے کر ان کے رشتہ دار تنازع کر رہے ہیں۔ اس زمین کی قیمت 8 کروڑ روپے بتائی جارہی ہے ۔ اس زمین تنازع پر منور رانا نے وزیر اعظم نریندر مودی کو خط بھیجا تھا، انہوں نے پی ایم سے یہاں بابری مسجد بنوانے کی پیشکش کی تھی۔
یہ متنازع زمین تمام بھائیوں میں برابر تقسیم ہو ئی تھی ۔ منور رانا کی ایک اور زمین ہے، جس کو وہ بیچ چکے ہیں۔ باقی زمین کے درمیان سے سڑک نکلی ، اس کو لے کر کسی نے تبریز رانا سے پیسے بھی مانگے تھے، لیکن بعد میں وہ پیسہ ادا نہیں کرسکے۔
تبریز رانا پرحملہ اسی زمین اور لین -دین کو لے کر کیا گیا تھا۔ منور رانا نے اپنے بھائیوں پر فائرنگ کرنے کا الزام لگایا ہے ۔ لوگوں کا کہنا ہے کہ رائے بریلی میں منور رانا کی اور بھی زمین ہے ، حالانکہ خاندانی جھگڑے میں کوئی کھل کر کچھ بھی نہیں بولنے کو تیار ہے۔
واضح رہے کہ منوررانا کے بیٹے تبریز پر پیر کی شام دو بائک سوار بدمعاشوں نے جان لیوا حملہ کیا تھا۔ یہ حملہ ان پر اس وقت ہوا جب وہ اپنی خاندانی زمین کے تنازع کو سلجھانے رائے بریلی آئے تھے۔ لکھنؤ واپسی کے دوران تبریز رائے بریلی کے شہر کوتوالی حلقہ کے تریپولا چوراہے کے نزدیک ایک پٹرول پمپ پر تیل بھروانے رکے تھے۔ پٹرول پمپ کے پاس ہی ان پر دو بائک سوار بدمعاشوں نے تابڑ توڑ فائرنگ کردی تھی۔ اس حملے میں وہ بال بال بچے تھے۔
گولیاں لگنے سے ان کی گاڑی میں کئی جگہ چھید ہو گیا تھا۔ تھوڑا سنبھلنے کے بعد تبریز نے بھی کار سے اتر کر اپنی لائنسنسی بندوق نکالی، لیکن تب تک بعدمعاش بھاگ چکے تھے، تبریز کی تحریر پر پولیس نے کیس درج کرلیا ہے ، اب پولیس سی سی ٹی وی کیمرے کی فوٹیج کھنگال کر معاملے کی جانچ میں مصروف ہے ۔ تبریزنے اپنے چچا پر جان لیوا حملہ کرنے کا الزام لگایا تھا۔
