نئی دہلی:
کانگریس کی جنرل سکریٹری پرینکا گاندھی اترپردیش کے اپنے تین روزہ دورے پر ہیں۔ یوپی میں آئندہ سال ہونے والے اسمبلی انتخابات کو لے کر پرینکا گاندھی نے پوری طاقت جھونک دی ہے۔ اترپردیش اسمبلی انتخابات کے لیے اتحاد بنانے کے معاملے پر کانگریس لیڈر پرینکا گاندھی واڈرا نے کہاکہ ہم کھلے دل کے ہیں۔ کانگریس جنرل سکریٹری نے کہاکہ انتخاب کے لیے دیگر پارٹیوں کے ساتھ اتحاد سے انکار نہیں کیا جاسکتا۔
کانگریس لیڈر نےیہ بھی کہاکہ ابھی وہ یہ نہیں کہہ سکتی کہ کانگریس اترپردیش کی تمام 403 اسمبلی سیٹوں پر انتخاب لڑے گی یا پھر اتحاد کرے گی، حالانکہ کوئی بھی اتحادپارٹی کے مفادات کی قیمت پر نہیں ہوگا۔
پرینکا نے خود کے اترپردیش کی سیاسی میدان سے اکثر غیر حاضر رہنے کے اپوزیشن کے الزامات کے بارے میں پوچھے جانے پر کہاکہ وہ اترپردیش میں ’ سیاسی سیاح ‘ نہیں ہیں اور وہ گزشتہ ڈیڑھ سال سے اسمبلی انتخابات کی تیاریوں میں مصروف ہیں اور پارٹی لیڈروں اور کارکنان کے لگاتار رابطہ میں ہے۔ اب وہ اترپردیش میں زیادہ وقت دیں گی۔
انہوں نے الزام لگایا کہ 2017 کے اسمبلی انتخابات میں بڑے بڑے دعوے کرکے اقتدار پر قبضہ کرنے والی بی جے پی کی اصلیت اب عوام کے سامنے پوری طرح ظاہر ہو گئی ہے اور کانگریس آئندہ اسمبلی انتخاب میں بی جے پی کی انہیں ناکامیوں کو عوام کے سامنے رکھے گی۔
اس سے قبل کانگریس جنرل سکریٹری پرینکا گاندھی کل ہفتہ کے رروز انیتا یادو سے ملاقات کی تھیں۔ انتیا یادو سے گرام پنچایت انتخاب کے دوران بدسلوکی کی گئی تھی۔ دبنگوں نے پرچہ نامزدگی کے دوران ان سے ہاتھا پائی کی تھی اور ان کی ساڑی کھینچ دی تھی۔ انتیا یادو سے ملاقات کے بعد پرینکا گاندھی نے کہا تھاکہ بی جے پی کے غنڈوں کو سزا ملنی چاہئے۔ وہ اترپردیش ہی نہیں ملک کی تمام خواتین کے ساتھ کھڑی ہیں۔ انہوں نے کہا تھاکہ اترپردیش میں جمہوریت کا چیر ہرن ہو رہاہے ، اس کے باوجود بھی وزیر اعظم یوپی میں سرکار کی تعریف کررہے ہیں۔
