غازی آباد:
بابا رام دیو اور ایلوپیتھی کے مابین جاری تنازع کم نہیں ہورہا ہے۔ یوگا گرو رام دیو نے ایک بار پھر سے ایلوپیتھک علاج اور ڈاکٹر کے حوالہ سے بڑا بیان دیا ہے ۔ انہوں نے ڈاکٹروں کا نام لئے بغیر کہاہے کہ انہیں جو نصاب پڑھایا جاتا ہے ، وہ ڈرگ مافیاکے ذریعہ تیار کیا جاتا ہے ۔
غازی آباد کے مودی نگر کے قریب سکری کلاں میں پتنجلی یوگ پیٹھ سینٹر کے افتتاح کے موقع پر بابا رام دیو نے کہا کہ یہ جسے ایڈوانس بیسٹ میڈیسن (ریسرچ پیپر) کہتے ہیں وہ ڈرگ مافیا کے ذریعہ تیار کیا جاتا ہے ۔ سچائی یہ ہے کہ یہ ڈرگ انڈسٹری کا نصاب ہے ۔ رام دیو نے کہاکہ دمہ ، شوگر ، گٹھیا ٹھیک ہوجاتے ہیں، لیکن جب بھی میں یہ کہتا ہوں ، لوگ مجھ پر اعتراض کرتے ہیں۔
قابل ذکر ہے کہ رام دیو نے کہا تھا کہ ایلوپیتھک دوا کے استعمال سے لاکھوں لوگوں کی موت ہوئی ہے۔ انہوں نے ایلوپیتھی کو ‘’ اسٹوپڈاور دیوالیہ سائنس‘ کہا تھا ، اس کے کچھ ہی دن بعد بابا رام دیو کی طرف سے ایک کے بعد ایک کئی بیان ایلوپیتھی کی مخالفت میں سامنے آئے تھے۔
ایک ویڈیو سوشل میڈیا پر وائرل ہوئی تھی جس میں وہ یہ کہتے ہوئے سنے گئے تھے کہ ایلوپیتھی ایک ایسی بیکار سائنس ہے کہ پہلے ان کی ہائیڈرو آکسیرکلروکین فیل ہو گئی ، پھر ریمیڈسیور فیل ہوگئی ۔ پھر اینٹی بایوٹیکس ان کے فیل ہوگئے ، اسٹیرائڈز ناکام ہوگئے ۔ پلازمہ تھراپی پر بھی بین لگ گیا۔
