نئی دہلی :
جمعیۃ علماء ہند کے نمائندہ اجلاس میں اکابر علماء کرام کی اتفاق رائے سے مولانا سید محمد ارشد مدنی کو امیر الہند خامس اور مفتی سید محمد سلمان منصور پوری کو نائب امیر الہند خامس منتخب کرلیا گیا ہے۔ اطلاعات کے مطابق اجلاس میں جمعیۃ علماء ہند کے نو منتخب صدر مولانا سید محمود اسعد مدنی نے مولانا ارشد مدنی کے نام کی تجویز پیش کی جس کو مہتمم دارالعلوم دیوبند مفتی ابو القاسم نعمانی اور دارالعلوم دیوبند کے مؤقر اساتذہ کرام نے اپنی تائید پیش کی۔ جس کے بعد باتفاق رائے مولانا ارشد مدنی کو پانچواں امیر شریعت منتخب کرلیا گیا۔
اس کے بعد مولانا ارشد مدنی نے اپنی نیابت کے لیے جانشین امیرالہند رابع مفتی سید سلمان منصورپوری کا نام پیش کیا اور شرکاء اجلاس کی تائید سے انہیں نائب امیر شریعت منتخب کرلیا گیا۔
واضح ہوکہ امیر الہند اول محدث کبیر ابو المآثر مولانا حبیب الرحمٰن اعظمی ، امیر الہند ثانی مولانا سید اسعد مدنی، امیر الہند ثالث مولانا مرغوب الرحمٰن ، امیر الہند رابع مولانا قاری سید عثمان منصور پوری رہے اور پانچویں امیر الہند کے طور پر مولانا سید ارشد مدنی دامت برکاتہم کو منتخب کیا گیا۔
