نئی دہلی :
دنیا کے مختلف ممالک میں حکومتوں کے ذریعہ صحافیوں اور مشہور چہروں کی جاسوسی کا معاملہ سامنے آیا ہے ۔ اس پر مرکزی سرکار نے اپنا جواب دیتے ہوئے کہا ہے کہ یہ رپورٹ شبیہ خراب کرنے کے ارادے سے تیار کی گئی ہے اور اس میں کوئی سچائی نہیں ہے۔ اس رپورٹ پر این ڈی ٹی وی کے صحافی رویش کمار نے نریندر مودی سرکار پر طنز کسا ہے ۔ انہوں نے لکھا کہ مالک کو اپنے غلاموں پر بھی شک ہے ۔
رویش کمار نے اپنی فیس بک پوسٹ میں لکھا کہ ’ تو صحافیوں کے فون سنے جارہے ہیں اس دور میں ، رکیئے ، ان صحافیوں کے بھی سنے جارہے ہیں جو سرکار بہادر کی خوشامد میں لگے ہیں۔ سب سے زیادہ شک تو انہی پر ہے ۔ مالک کو اپنے غلاموں پر شک ہے ۔ ہاہا!!۔ انہوں نے اپنی بات کو آگے بڑھاتے ہوئے لکھا ہے کہ اگر تمام ترتوانائی اسی میں صرف کردیں گے تب تو معاشی حالت خراب ہوجائے گی ، تب تو آپ بے روزگار ہوں گے اور تب تو آپ آئی ٹی سیل کے مدعوں میں بہکائے جائیں گے ۔ ہندو مسلمان کریں گے۔ ہندی پردیش کے نوجوانوں بہت تکلیف ہوتی ہے تمہارے برباد مستقبل کے راستوں کو دیکھ کر ۔ کام سے کم پڑھ لیجئے۔
ان کے فیس بک پوسٹ پر تمام یوزر تبصرے کررہے ہیں۔ کچھ لوگ ان کی اس بات کی حمایت کررہے ہیں وہیں کچھ لوگ انہیں اپنی توانائی ان باتوں میں نہ صرف کرنے کامشورہ دے رہے ہیں۔ منوج شرما نام کے ایک فیس بک یوزر نے تبصرہ کرتے ہوئے لکھاکہ ’ اچھا جی! تو ٹول کٹ گینگ چائنا سے فنڈنگ لے کر نکسلی گوتم نولکھا کو پہنچا رہے ہیں اور سرکار ان پر نظر پر بھی نہ رکھے۔ گزشتہ سرکاروں میں بہت ملائی چاٹ لی ہے ۔ اب وقت ہے حساب چکانےکا ۔
ایک فیس بک یوزر رویش کمار کے اس پوسٹ پر اپنے رد عمل کااظہار کرتے ہوئے لکھتا ہے کہ دنیا کی کوئی سرکار ایسی نہیں کہ جو فون ٹیپ نہ کراتی ہو۔ سرکار تو چھوڑو،تمام کمپنیاں اپنے ایمپلائز پر نگرانی رکھنے کے لیے سی سی ٹی وی کیمرے بھی لگواتی ہیں۔ یہ ملک کی داخلی سلامتی کے لیے ضروری ہے ،اگر آپ کچھ غلط نہیں کررہے ، چوری نہیں کررہے ہیں تو ریکارڈنگ سے کیسا گھبرانا ؟کیمرے اور فون ٹیپ کے ڈر کا ماحول چوروں میں ہوتاہے ۔ آپ چاہیں تو اے ٹی ایم ، مالس، سڑکوں پر لگے کیمروں کو بھی لعنت بھیج سکتے ہیں۔ یوں چور کی داڑھی میںتنکا ۔ اب تو واقعی ڈر کاماحول ہے۔ سدھانشو کمار نام کے یوزر کمینٹ کرتے ہوئے لکھتے ہیں کہ بہت تشویش کی بات ہے کہ آپ کا نام نہیں ہے ، ان کی فہرست میں مطلب اب آپ کو پھر نئے سرسے کام کرنا پڑے گاتاکہ کچھ تو توجہ آپ پر دے ۔ لگے رہئے ہماری دعا ہے ۔
