لکھنؤ:
یوپی بورڈ کا تعلیمی کیلنڈر جاری کر دیا گیا ہے۔ تعلیمی کیلنڈروں کے مطابق سہ ماہی امتحانات ستمبر میں ہوں گے جبکہ بورڈ ایگزام آئندہ سال مارچ 2022 میں ہوگا۔ تعلیمی کیلنڈروں کی بات کریں تو اس پر کورونا کا اثر صاف دیکھنے کو مل رہاہے ۔ پہلی بار ایسا ہو رہاہے کہ جب ستمبر کے تیسرے اور چوتھے ہفتے میں سہ ماہی امتحانات ہوں گے۔
وہیں اکتوبر کے دوسرے ہفتے تک اس کے نمبرات اپ لوڈ کرنے ہوں گے۔کلاس 9 اور 10 کے امتحانات کے لیے اگست ،اکتوبر اور جنوری 2022 میں داخلی تشخیص ہوگا ۔ انہی مہینوں کے دوران آخری ہفتے میںداخلی تشخیص ویب سائٹ پر اپ لوڈ کرنے ہوں گے ۔ مارچ 2022 میں بورڈ ایگزام ہوگا۔
کووڈ-19 کی وجہ سے تعلیمی سیشن 2021-22میں سیکنڈری اسکولوں میں 20 مئی سے آن لائن تدریسی عمل شروع ہوچکاہے ۔ طلبہ کی پیشرفت کی تشخیص کرنے کے لیے مختلف کلاسوں میں آن لائن یا آف لائن کے ذریعہ ملٹی پل چوائس سوالات (ایک سے زیادہ انتخاب کے سوالات )پر مبنی ماہانہ امتحان کرایا جائے گا۔اس کے حاصل کردہ نمبرات ثانوی تعلیم بورڈ کی ویب سائٹ پر اپ لوڈ کئے جائیں گے۔ ستمبر کے دوسرے و تیسرے ہفتے میں ششماہی امتحان کرایا جائےگا۔ ششماہی امتحان میں حاصل کردہ نمبرات کو جنوری 2022 کے پہلے ہفتہ تک اپ لوڈ کردئے جائیں گے۔
کلاس 10 اور 12 ویں کا تدریس عمل آن لائن یا آف لائن 15 جنوری اور کلاس 9 و 11 ویں کے لیے تدریسی عمل 31 جنوری 2022 تک مکمل کرایا جائے گا۔ پریکٹیکل ایگزام کا انعقاد یکم جنوری سے لے کر 31 جنوری تک دو مرحلے میں پورا کرایا جائے گا۔
پری بورڈ امتحان فروری 2022 کے پہلے اور دوسرے ہفتے میں لیا جائے گا۔ اس کے نمبرات اسی ماہ کے چوتھے ہفتے تک اپ لوڈ کرنے ہوں گے۔ کلاس نو اور کلاس 11 ویں کا سالانہ ہوم ایگزام فروری 2022 کے تیسرے اور چوتھے ہفتے میں لیا جائے گا۔ اس کے نمبرات مارچ 2022 کے تیسرے ہفتے تک اپ لوڈ کرنے ہوں گے۔ کلاس 10 اور کلاس 12 ویں کے بورڈ امتحانات مارچ 2022 کے پہلے اور دوسرے ہفتے میں ہوں گے۔ آئندہ تعلیمی کیلنڈر 2022-23 اپریل 2022 میں جاری ہوگا۔
