بھوپال :(ایجنسی)
ملک میں رسوئی گیس کے ساتھ – ساتھ ڈیزل اور پٹرول کی قیمتوں میں اضافے کا سلسلہ لگاتار جاری ہے ، جو رکنے کا نام نہیں لے رہاہے ۔ پٹرول اور ڈیزل کی قیمت میں مہنگائی سے راحت ملنے کی کوئی گنجائش نہیں نظر آرہی ہے ۔ اسی درمیان مہنگائی کو لے کر پوچھے گئے سوال پر بھارتیہ جنتا پارٹی (بی جے پی ) کے ایک لیڈر نے متنازع بیان دیا ہے ، جس کی ویڈیو اب سوشل میڈیا پر خوب وائرل ہورہی ہے ۔ بی جے پی لیڈر نے کہاکہ اگر آپ کو پٹرول – ڈیزل سستا چاہئے تو افغانستان چلے جاؤ ۔
آن لائن پورٹل جنتا کا رپورٹر کی رپورٹ کے مطابق ایک صحافی سے بات کرتے ہوئے مدھیہ پردیش کے کٹنی کے بی جے پی ضلع صدر رام رتن پائل نے کہا:’’ طالبان ، چلے جاؤ۔ افغانستان میں جاکر دیکھ لو ۔ پٹرول 50 روپے ہے وہاں۔ وہاں سے بھروا کے لاؤ ۔ وہاں بھروانے والا کوئی نہیں ہے ۔‘‘ پائل نے صحافیوں سے کہاکہ ملک میں کورونا کی دو لہریں آچکی ہے، تیسری لہر آنے والی ہے۔ ملک کس صورت حال سے گزر رہا ہے ،ذرا بھی احساس ہے آپ کو ؟ تمہیں پٹرول -ڈیزل کی پڑی ہے ۔
اس پر صحافی نے کہاکہ :’’ لیکن میں اپنے ملک کی بات کررہا ہوں، مہنگائی اپنے عروج پر ہے؟ ‘‘ اس پر بی جے پی لیڈر نے پھر کہا ، تو طالبان چلے جاؤ ،یہاں کیوں ہو۔‘
چونکا دینے والی بات یہ ہے کہ ویڈیو میں بی جے پی کے ضلع صدر کووڈ کی تیسری لہر کی آمد کی بات کر رہے تھے اورخود ہی ماسک نہیں لگائے ہوئے تھے۔ ان کے ساتھی بھی بغیر ماسک کے ساتھ میں کھڑ ےنظر آرہے ہیں ۔ بی جے پی لیڈر کی یہ ویڈیو اب سوشل میڈیا پر بہت وائرل ہو رہی ہے ، جس کی وجہ سے وہ سوشل میڈیا صارفین کے نشانے پر آگئے ہیں۔ لوگ انہیں سخت ٹرول کر رہے ہیں اور کھری کھوٹی سنا رہے ہیں۔
