پٹنہ :
بہار میں پنچایت انتخاب کی تاریخیں طے ہوچکی ہیں۔ 20 ستمبر میں ریاست میں پنچایت انتخابات ہوں گے۔ پنچایت انتخابات کی تاریخ طے ہوتے ہی بہار میں سیاسی رنجش کا دور شروع ہوگیا ہے ۔ جمعہ کو سمستی پور میں دن دہاڑے ایک سابق مکھیا کا گولی مار کر قتل کردیا گیا۔ ملزمین نے سابق مکھیا کے سر میں پانچ گولیاں داغی جس کی وجہ سے موقع پر ہی موت ہوگئی۔
موصولہ اطلاع کے مطابق سمستی پور کے مسری گھراری تھانہ حلقہ کے بکھری بزرگ پنچایت کے سابق مکھیا ششی ناتھ جھا اپنے علاقے میں پنچایت کرنے گئے ہوئے تھے۔ پنچایت کرنے کے بعد جیسے ہی سابق مکھیا ششی جھا اپنے گھر کی جانب روانہ ہونے کے لیے گاڑی کی طرف جارہے تھے تو پہلے سے گھات لگائے ملزمین نے ان پر گولی کی تابڑ توڑ فائرنگ کردی۔ ملزمین نے تقریباً پانچ گولیاں ان کے سر میں داغی، جس کی وجہ سے سابق مکھیا ششی ناتھ جھا کی موت پر موقع پر ہی ہوگئی۔
اس واقعہ کی خبر جیسے ہی علاقے کے لوگوں کو ہوئی تو لوگوں نے سڑک جام کر دیا اور جم کر ہنگامہ کیا، جس کی وجہ سے علاقہ کی تمام دکانیں اور بازار بند کردئے گئے۔ لوگوں نے این ایچ28-پر ٹائر جلاکر اس واقعہ کی مخالفت کی۔ واقعہ کے بعد سے علاقے میں تناؤ کی صورت حال بنی ہوئی ہے ۔ پولیس نے تناؤ کے مدنظر پولیس فورس کوتعینات کردیا ہے ۔
بتادیں کہ ریاستی الیکشن کمیشن نے پنچایتی انتخابات کے لیے نوٹیفکیشن جاری کرنے کے حوالے سے اپنی سفارش پنچایتی راج ڈپارٹمنٹ کو بھیج دی ہے اور 20 اگست تک نوٹیفکیشن جاری کرنے کی درخواست کی ہے۔ کمیشن کی سفارش کے مطابق پنچایت انتخابات 10 مرحلوں میں ہوں گے۔ پہلا مرحلہ 20 ستمبر ، دوسرا مرحلہ 24 ستمبر ، تیسرا مرحلہ 4 اکتوبر ، چوتھا مرحلہ 8 اکتوبر ، پانچواں مرحلہ 18 اکتوبر ، چھٹا مرحلہ 22 اکتوبر ، ساتواں مرحلہ 31 اکتوبر ، آٹھواں 7 نومبر ، نواں 15 نومبر اور آخری مرحلے کی پولنگ 25 نومبر کو ہوگی۔
