وقف ترمیمی ایکٹ ملک میں نافذ،نوٹیفیکیشن جاری

نئی دہلی:وقف ترمیمی قانون آج یعنی 8 اپریل سے پورے ملک میں نافذ ہو گیا ہے۔ اس کا نوٹیفکیشن مرکزی وزارت داخلہ نے جاری کیا ہے۔ اس قانون کے خلاف سپریم کورٹ میں اب تک کل 15 درخواستیں دائر کی گئی ہیں۔ مرکزی حکومت نے سپریم کورٹ میں ایک کیویٹ داخل کیا اور وقف (ترمیمی) ایکٹ 2025 کے آئینی جواز کو چیلنج کرنے والی درخواستوں پر کوئی حکم دینے سے پہلے سماعت کی درخواست کی۔اقلیتی امور کی وزارت کے نوٹیفکیشن میں کہا گیا ہے، "وقف (ترمیمی) ایکٹ، 2025 کے سیکشن 1 کی ذیلی دفعہ (2) کے ذریعے عطا کردہ اختیارات کا استعمال کرتے ہوئے، مرکزی حکومت نے مذکورہ ایکٹ کی دفعات کو 8 اپریل 2025 سے نافذ کیا ہے۔” وقف ترمیمی قانون کے خلاف ملک کی کئی ریاستوں میں احتجاجی مظاہرے بھی ہو رہے ہیں۔ جماعت اسلامی ہند نے وقف قانون کو لے کر مرکزی حکومت کے خلاف محاذ کھولا اور اسے مسلمانوں کے خلاف قرار دیا۔
سپریم کورٹ وقف ترمیمی قانون پر 15 اپریل 2025 کو سماعت کرے گی۔ مرکزی حکومت کی طرف سے بار بار کہا گیا ہے کہ یہ قانون جائیداد اور اس کے انتظام کے بارے میں ہے، مذہب کے بارے میں نہیں۔ بی جے پی کا کہنا ہے کہ وقف بل عوام کے ایک بڑے طبقے سے مشاورت کے بعد تیار کیا گیا ہے اور اسے غیر مسلم اقلیتوں کی حمایت بھی حاصل ہوئی ہے۔ مرکز کے مطابق، خواتین اور بچے وقف املاک سے فائدہ حاصل کرنے کے قابل نہیں تھے، جبکہ ترمیم شدہ قانون یہ فائدہ فراہم کرے گا۔