نئی دہلی :
دہلی کی ایک عدالت نے ترنمول کانگریس کی ممبر پارلیمنٹ مہوا موئترا کے ذریعہ دائر ہتک عزت کی شکایت میں ہند ی نیوز چینل زی نیوز کے ایڈیٹر و سینئر صحافی سدھیر چودھری کو ملزم کے طور پر طلب کرنے کے حکم کے خلاف داخل عرضی کو خارج کرد یا۔ مہوموئترا نے سدھیر چودھری اور ٹی وی نیوز چینل کے خلاف 2019 میں پارلیمنٹ میں دئے گئے ان کے ایک خطاب پر نشرایک شو کے سلسلے میں شکایت درج کی تھی۔
نیوز ایجنسی پی ٹی آئی کی رپورٹ کے مطابق ایڈیشنل سیشن جج انل انتل نے ایک مجسٹریٹ کورٹ کے فیصلے کے خلاف داخل ایک عرضی پر حکم جاری کیا، جس نے دستمبر 2019 میں چودھری کو طلب کیا تھا ۔ چودھری نے میٹرو پولیٹن مجسٹریٹ کے حکم کے خلاف سیشن عدالت کا دروازہ کھٹکھٹایا تھا۔
سیشن عدالت نے پیر کو اپنے حکم میں کہا ہے کہ مجسٹریٹ عدالت کے فیصلے میں کسی طرح کی مداخلت کی ضرورت نہیں ہے۔ جج نے کہا ،’مجھے یہ کہنے میں کوئی عار نہیں ہے کہ ایم ایم (میٹرو پولیٹن مجسٹریٹ) کےذریعہ جاری سمن آرڈر میں کوئی غیر قانونی کارروائی یا تحریف نہیں ہے اور اس میں کسی مداخلت کی ضرورت نہیں ہے اور اس طرح نظرثانی کی درخواستیں خارج کی جاتی ہیں۔‘
ترنمول کانگریس کی رکن پارلیمنٹ مہوا موئترا کی طرف سے پیش ہوئے سینئر ایڈووکیٹ وکاس پاہوا نے نظرثانی درخواست کی مخالفت کرتےہوئے عدالت کو بتایا کہ اس میں جو بنیاد اٹھاگئی ہے وہ غیرسنجیدہ اور حقائق کے برخلاف ہے۔
