نئی دہلی :
جامعہ ملیہ اسلامیہ یونیورسٹی کے 6 ریسرچ اسکالر کو وزیر اعظم ریسرچ فیلوشپ (پی ایم آر ایف) کے اعزاز سے نوازا گیا۔ ان ریسرچ اسکالروں کو دسمبر 2020 ڈرائیو کی لیٹرل انٹری اسکیم کے تحت وزیر اعظم ریسرچ فیلوشپ (پی ایم آر ایف) سے نوازا گیا ۔ مرکزی وزارت تعلیم کی جانب سے موصولہ اطلاع کے مطابق ان تمام طلباکی فیلوشپ 70000 روپے ماہانہ سے شروع ہوگی اور 2 لاکھ تک کی رقم دی جائے گی۔
جامعہ سے موصولہ اطلاعات کے مطابق جامعہ سول انجینئرنگ ڈپارٹمنٹ کی فوزیہ تبسم، سول انجینئرنگ ڈپارٹمنٹ کی مومنہ ، الیکٹرک انجینئرنگ ڈپارٹمنٹ کی عذرا ملک ، سینٹر برائے نانولوجی اینڈ نانوٹیکنالوجی کے فیروز خان ، پی ایم آر ایف کے لئے سینٹر فار بیسک انٹر ڈسکپلنری ریسرچ اینڈ فزیو تھراپی کی عالیہ طیب اور ریبلیشن سائنس سینٹر کی آشی سیف شامل ہیں۔
فیلوشپ کے لئے ریسرچ اسکالر کے انتخاب پر جامعہ کی وائس چانسلر پروفیسر نجمہ اختر نے تمام ریسرچ اسکالرز کو ذاتی طور پر مبارکباد دی۔ انہوں نے امید ظاہر کی کہ اس سے یونیورسٹی کے دوسرے طلبا بھی ریسرچ میں بہتر کارکردگی کا مظاہرہ کریں گے۔ انہوں نے کہا کہ جامعہ ایکسی لینس کے لئے تیار ہے اور اپنے طالب علموں کو اونچائیوں کے حصول کے لئے ہر ممکن مدد فراہم کرنے کے لئے سخت محنت کرتا ہے۔
