لکھنؤ :(ایجنسی)
اتر پردیش کے وزیر اعلیٰ یوگی آدتیہ ناتھ نے ایک پروگرام کے دوران اپوزیشن جماعتوں پر زبردست حملہ بولا۔ سماج وادی پارٹی پر تنقید کرتے ہوئے انہوں نے کہا کہ پہلے صرف ایک پریوار ترقی کرتا تھا ، لیکن مودی کے دور حکومت میں ‘’سب کا ساتھ اور سب کا وکاس‘ ہو رہا ہے۔ یوگی نے کہا کہ پچھلے ساڑھے چار سالوں میں یوپی میں کوئی فساد نہیں ہوا۔ انہوں نے کہا کہ فسادیوں کو معلوم تھا کہ اگر فسادکیا تو سات پشتوں کو جرمانہ بھرنا پڑے گا۔
سی ایم یوگی نے کہا کہ ‘2014 سے پہلے بہت سی پارٹیوں کا نعرہ ہوا کرتا تھا کہ سب کا ساتھ اور پریوار وکاس۔ وہ اپنے خود کو اور اپنے پریوار کی ترقی کے علاوہ کچھ نہیں سوچ پاتے تھے۔ پہلے کی سرکاریں فسادات کوپناہ دیتی تھیں۔ وہ انہیں ہر قسم سے آگے بڑھانے کا کام کرتی تھیں۔ آئے دن کرفیو لگ جاتا تھا۔ اکثریت برادری مظلوم ہوتی تھی۔ جو چراغ بناتے تھے ان کے چراغ توڑ دئے جاتے تھے اور تہواراندھیرے میں منائے جاتے تھے ۔
چیلنج دیتے ہوئے یوگی نے کہاکہ گزشتہ ساڑھے چار سال میں یوپی میں ایک بھی فساد نہیں ہوا۔ فسادیوں کو پہلے ہی پیغام دیا جاچکا ہے کہ چار نسلوں کا پٹہ لکھ کر جانا، وہ جرمانہ بھرتی رہیں گی۔ بجلی کے مسائل کو لے کر بھی یوگی نے کہاکہ کوئلے کی کمی کی وجہ سے بجلی کا بحران ہے لیکن یوپی سرکار دوسری ریاستوں سے مناسب بجلی خرید رہی ہے اور اسی وجہ سے ریاست میں اندھیرا نہیں ہوا ۔
یوگی آدتیہ ناتھ نے کورونا وائرس انفیکشن کی وجہ سے جان گنوانے والے لوگوں کے اہل خانہ کو ریلیف فنڈ تقسیم کرنے کے لیے ڈسٹرکٹ مجسٹریٹس کی صدارتمیں کمیٹی تشکیل دینے اور تفصیلی ہدایات جاری کرنے کاحکم دیا ہے ۔ اتوار کو جاری ایک سرکاری بیان کے مطابق وزیر اعلیٰ نے کووڈ 19-مینجمنٹ کے لیے تشکیل ٹیم کو ہدایت دی کہ انفیکشن کی وجہ قبل از وقت فو ت ہوئے لوگوں کے اہل خانہ کو اب 50 ہزار روپے ریلیف فنڈد کے طور پر دئے جائیں گے ۔
وزیراعلیٰ نے کہا کہ اس بات کو یقینی بنایا جائے کہ ایک بھی اہل خانہ اس امدادی رقم سے محروم نہ رہے۔ اس سلسلے میں تفصیلی ہدایات جلد از جلد جاری کی جائیں اور ضلع مجسٹریٹ کی صدارت میں اضلاع میں ایک کمیٹی تشکیل دی جائے۔ بیان کے مطابق ریاست کے کل 75 اضلاع میں سے 42 اضلاع کووڈ- 19 کے انفیکشن سے پاک ہوگئے ہیں، جبکہ 16 اضلاع میں صرف ایک مریض ہے۔ اب ریاست میں زیر علاج مریضوں کی تعداد 119 رہ گئی ہے۔
