جمعیۃ علماء اور جماعت اسلامی آسام واقعہ پر ایک پلیٹ فارم پر ،مشترکہ وفد کی سی ایم سے ملاقات

نئی دہلی: (پریس ریلیز)

جمعیۃ علما ء ہند اور جماعت اسلامی ہند کے مشترکہ وفد نے جمعیۃ علماء ہند کے قومی صدر مولانا محمود مدنی اور جماعت اسلامی ہند کے امیر سیدسعادت اللہ حسینی کی ہدایت پر آسام کے وزیر اعلیٰ ہیمنت کمار بسوا سرما سے گوہاٹی میں واقع ان کے دفترمیں ملاقات کی اور ضلع درنگ کے دھول پور میں سرکاری زمین کے انخلاکی وجہ سے پیش آمد ہ واقعہ اور انسانی عظمت کی بے توقیر ی اور غریب و مزدور طبقے کو اپنے ہی وطن میں بے گھر کرنے پر سخت ناراضی ظاہر کی۔

مطالبہ کیا کہ اس سانحہ کی اعلیٰ سطحی جوڈیشیل انکوائری کرائی جائے۔ پولس ایکشن میں ہلاک ہونے والوں کو بیس لاکھ اور زخمی ہونے والوں کو دس لاکھ معاوضہ دیا جائے۔ اجاڑے گئے خاندانوں کے لیے دوا، پانی، اور اشیائے خوردنی کا انتظام کیاجائے۔سرکار کی طرف سے چھ بیگھہ زمین کھیتی کے لیے اور ایک بیگھہ زمین جو رہائش کے لیے دینے کاوعدہ کیا تھا،اسے جلد پورا کیا جائے۔

وفد میں شریک جمعیۃ علماء ہند کے جنرل سکریٹری مولانا حکیم الدین قاسمی نے کہا کہ درنگ ضلع میں جو کچھ ہوا، وہ انسانیت سوز ہے، ہم یہ امید کرتے ہیں کہ آپ مظوموں کو انصاف دلانے میں ذاتی طور سے مدد کریں گے،ہمارے ملک کے آئین میں انسانی حقوق کو اولیت حاصل ہے، کوئی بھی زمین کا ٹکڑا کسی انسان کی جان سے اہم نہیں ہے، اس لیے ہم امید کرتے ہیں کہ آسام کے وزیر اعلی انسانی اقدار کا تحفظ کریں گے اورمظلوموں کو انصاف دلانے میں مستعدی سے کام لیں گے۔

اس سے قبل اتوار کو مشترکہ وفد نے ضلع درانگ کے ڈی سی شریمتی پرابھتی تھاؤسین اور ایس پی شری سوشانتا وسوا شرماسے ملاقات کرکے پولس ایکشن کی سخت الفاظ میں مذمت کی، اس پر سوشانتا وسوا شرما نے کہا کہ اس واقعہ کی اعلی جوڈیشیل انکوائری کرائی جارہی ہے، آگے کی بھی کارروائی کریں گے۔واضح ہو کہ جمعیۃ علماء ہند کے صدر مولانا محمود مدنی نے 24ستمبر کو وزیر داخلہ، ہیومن رائٹس کمیشن اور وزیر اعلی آسام کو خط لکھ کر انصاف کی جانب تو جہ دلائی تھی۔

جمعیۃ علماء آسام کے ناظم اعلی جناب حافظ بشیر احمد قاسمی نے بتایا کہ ہمارا وفد زخمیوں سے اسپتال میں ملے گا، اس کے بعد متاثرہ خاندانوں سے درانگ ضلع میں جاکر ملے گا، انھوں بتایا کہ سردست جمعیۃ علماء آسام کے صدر مولانا بدرالدین اجمل قاسمی نے طے کیا ہے کہ زخمیوں کو جمعیۃ علماء آسام او راجمل فاؤنڈیشن کی طرف سے بیس بیس ہزار روپے پیش کیا جائے گا۔

وفد میں مولانا حکیم الدین قاسمی، جنرل سیکرٹری جمعیۃ علماء ہند، امین الحسن، نائب صدر جماعت اسلامی ہند، محمد شفیع مدنی، سیکرٹری جماعت اسلامی ہند، سلمان احمد، صدر ایس آئی او انڈیا، مولانا عبدالسلام جنرل سکریٹری جمعیۃ علماء مغربی بنگال،حافظ بشیر احمد قاسمی جنرل سکریٹری جمعیۃ علماء آسام،مولانا عبدالقادر قاسمی ایڈیشنل جنرل سکریٹری جمعیۃ علماء آسام، مو لانا محبوب حسن ایڈیشنل جنرل سکریٹری جمعیۃ علماء آسام، ڈاکٹر حافظ رفیق الاسلام قاسمی ایم ایل اے اور سکریٹری جمعیۃ علماء آسام، الحاج امین الاسلام ایم ایل اے، مجیب الرحمن ایم ایل اے، مومن الرحمن آفس سکریٹری جمعیۃ علماء آسام، مولانا ہاشم نائب صدر جمعیۃ علماء کوکرا جھار اور جمعیۃ علماء درنگ کے کارکنان شامل تھے۔