لکھنؤ:
سماج وادی پارٹی کے سرپرست ملائم سنگھ یادو کے پریوار سے متعلق بڑی خبریں سامنے آرہی ہیں۔ ملائم سنگھ یادو کے چھوٹے بیٹے پرتیک یادو کے سالے امن سنگھ بشٹ پر آمدنی سے زیادہ اثاثوں کا الزام عائد کیا گیا ہے۔ اس پر ایک درجن سے زائد فرضی کمپنیاں بنا کر کروڑوں روپے کا لین دین کرنے کا الزام عائد کیا گیا ہے۔ امن سنگھ بشٹ نے اپنے قریبی رشتہ داروں کے ساتھ مل کر ایک درجن سے زائد ایسی کمپنیاں بنائی ، جو لاکھوں کروڑوں کا لین دین کرتی تھیں ، لیکن زمینی سطح پر ان کا کوئی کام نظر نہیں آتا تھا۔
ملائم سنگھ یادو اور ان کے اہل خانہ کے خلاف آمدنی سے زیادہ اثاثوں کا مقدمہ درج کروانے والے ایڈووکیٹ وشوناتھ چترویدی نے سی بی آئی کے ڈائریکٹر کو ایک خط لکھا ہے۔ سی بی آئی ڈائریکٹر کو لکھے گئے خط میں پرتیک یادو کے سالے امن سنگھ بشٹ اوران کی ایک درجن سے زیادہ کاغذی کمپنیوں کی جانچ کرائے جانے کی گزارش کی گئی ہے۔
سی بی آئی کے ڈائریکٹر کو بھیجے گئے خط میں ایڈووکیٹ وشوناتھ چترویدی نے کہا ہے کہ ایک درجن سے زائد کمپنیوں کے ذریعے کروڑوں روپے اکٹھے کیے گئے ہیں ، جن میں مونل انفرا پروجیکٹس پرائیویٹ لمیٹڈ ، مونل انفرا وینچرس پرائیویٹ لمیٹڈ ، پسیسیا پاؤر ٹرانسمیشن لمیٹڈ شامل ہیں۔ تمام کمپنیاں ایک ہی ایڈریس 2/11 ویراٹ کھنڈ گومتی نگر میں رجسٹرڈ ہیں۔ سی بی آئی کو لکھے گئے خط میں ایڈووکیٹ وشوناتھ چترویدی نے سی بی آئی تحقیقات کا مطالبہ کیا ہے۔ 16 فروری کو سی بی آئی کو لکھے گئے خط میں پوری معلومات دی گئیں۔ ایڈووکیٹ وشوناتھ چترویدی نے کہا کہ ایک ماہ پورے ہونے پر سپریم کورٹ میں پٹیشن دائر کی جائے گی۔
