لکھنؤ :
یوپی میں صرف ایک ہفتے میں ہی یومیہ ملنے والے مریضوں کی تعداد تین گنا بڑھ گئی ہے۔ ہفتہ کے روز ریاست میں 3290 نئے کورونا پازیٹو مریض پائے گئے ہیں۔ ہولی سے پہلے 26 مارچ کو ریاست میں 1032 مریض رپورٹ ہوئے تھے۔ اس کے بعد جب ہولی میں جانچ کم ہوئی تو مریضوں کی تعداد کم ہوگئی۔ پھر ایک دن میں2 ایرپل کو 2967 نئے مریض پائے گئے۔ 03 اپریل کو یہ تعداد تین ہزار کو عبور کر گئی۔
ریاست میں پنچایت انتخابات اور افتتاحی پروگراموں میں ہجوم کے درمیان کورونا انفیکشن کنٹرول سے باہر ہو رہا ہے۔ ہفتہ کے روز مریضوں کی تعداد 3290 ہوگئی۔ گزشتہ سال 26 جولائی 2020 کو ریاست میں تین ہزار سے زیادہ مریض پائے گئے تھے۔ جب کورونا انفیکشن مستقل طور پر بڑھ رہا تھا۔ اسی وقت 07 اکتوبر کو جب انفیکشن کم ہورہا تھا تو تین ہزار سے زیادہ مریض پائے گئےتھے۔ انفیکشن کنٹرول میں ہونے کے تقریباً6 ماہ بعد مریضوں کی تعداد میں ایک بار پھر تیزی سے اضافہ ہوا ہے۔
ایڈیشنل چیف سکریٹری امت موہن پرساد نے بتایا کہ جمعہ کو 166110 نمونوں کی جانچ کی گئی۔ ان میں سے 76 ہزار نمونوں کا آر ٹی پی سی آر سے جانچ کئے گئے ہیں۔ ریاست میں اب تک 35236205 نمونوں کی جانچ کی جاچکی ہے۔ ان میں سے 625923 افراد مثبت پائے گئے ہیں۔ کل مثبت لوگوں میں سے 600577 اب تک انفیکشن سے نجاب پاچکے ہیں۔ کل 8850 مریضوں کی موت واقع ہوچکی ہیں۔ نئے مریضوں کے اضافے کے ساتھ فعال مریضوں کی تعداد بھی بڑھ کر 16496 ہوگئی ہے۔
انفیکشن اور اموات کے معاملات میں لکھنؤ نمبرون پر
ریاست کی راجدھانی لکھنؤکورونا انفیکشن کے نئے معاملات میں ہفہ کو ملے 1041 مریضوں کے ساتھ پہلے نمبر پر ہے۔مثبت مریضوں کی تعداد یہاں 5408 ہے۔ ہفتہ کے روز لکھنؤ میں چھ مریضوں کی موت بھی ہوگئی۔ اس کے علاوہ شاہجہانپور میں 02 ، وارانسی ، آگرہ ، بلیا ، رائے بریلی ، اناؤ ، بھدوہی میں 1-1متاثرہ مریض کی موت ہوگئی ہے۔ ریاست میں ہفتہ کے روز مجموعی طور پر 14 مریضوں کی موت درج کی گئی ہے۔ سب سے زیادہ کورونا مثبت پریاگ راج میں 299، وارانسی میں 226، کانپور میں 171 ، گورکھپور میں 92، بریلی میں 71، گوتم بدھ نگر میں 70، آگرہ میں 67، میرٹھ میں 64، غازی آباد میں 55، متھرا میں 51 ، مظفر نگر میں 47 مریض ملے ہیں۔
