ممبئی(پریس ریلیز)
آل انڈیا یونانی طبی کانگریس مہاراشٹر اسٹیٹ کی تشکیل نو کے سلسلے میں ہوٹل عربین دربار، چیمبور، ممبئی میں میٹنگ ہوئی، جس کی صدارت ڈاکٹر ایس ایم حسین نے کی۔ میٹنگ میں پچھلی تشکیل شدہ آل انڈیا یونانی طبی کانگریس مہاراشٹر اسٹیٹ کے کاموں کو سراہا گیا اور اس امر پر خوشی کا اظہار کیا گیا کہ ہماری کوششوں سے ESIS میں یونانی ڈاکٹروں کی بھرتی کا سلسلہ شروع ہونے جارہا ہے اور مراٹھواڑہ میں نئی یونانی ڈسپنسری کھولنے کا کام بھی شروع ہوگیا ہے۔
میٹنگ میں ڈاکٹر ایس ایم یعقوب (کارگزار صدر، آل انڈیا یونانی طبّی کانگریس مہاراشٹر اسٹیٹ) نے کہا کہ ریاست مہاراشٹر میں بننے والے اردو گھر میں یونانی ڈسپنسری کے قائم کرنے کا مسودہ پیش کیا جاچکا ہے جس پر حج کمیٹی مہاراشٹر اسٹیٹ نے مثبت رخ اختیار کیا ہے ۔ میٹنگ میں اتفاق رائے سے طے پایا کہ حج سروسز میں یونانی ڈاکٹروں کو بھی شامل کیا جائے اور محکمہ آیوش، حکومت مہاراشٹر میں ڈپٹی ڈائرکٹر یونانی کا تقرر جلد سے جلد کیا جائے۔ میٹنگ میں بطور مہمان خصوصی ڈاکٹر ظہیر قاضی (صدر انجمن اسلام ممبئی) نے شرکت کی۔
انہوں نے آل انڈیا یونانی طبی کانگریس مہاراشٹر اسٹیٹ کی کارکردگی کو سراہا۔ اس موقع پر ڈاکٹر ظہیر قاضی کی سرپرستی میں آل انڈیا یونانی طبی کانگریس مہاراشٹر اسٹیٹ کے نئے عہدہ داران کی تشکیل نو کا اعلان کیا گیا، جس میں ڈاکٹر شکیل احمد خان (صدر)، ڈاکٹر عظیم بیگ، ڈاکٹر مہندی حسن (نائب صدور)، ڈاکٹر محمد اویس حسن (جنرل سکریٹری)، ڈاکٹر ندیم عثمانی ، ڈاکٹر رفیق احمد، ڈ اکٹر سولنکی ناگپوری، ڈاکٹر احتشام (سکریٹریز)، ڈاکٹر عبدالصمد، ڈاکٹر افضل، ڈاکٹر شفیع انور، ڈاکٹر زاہد خان، ڈاکٹر ذاکر انصاری، ڈاکٹر امتیاز، ڈاکٹر مختار انصاری، ڈاکٹر فیضان انصاری، ڈاکٹر شکیلہ انصاری، ڈاکٹر نصرت چوہان (اراکین) شامل ہیں۔
اس موقع پر آل انڈیا یونانی طبّی کانگریس کے قومی نائب صدر ڈاکٹر ایس ایم حسین نے اس امر پر خوشی کا اظہار کیا کہ مذکورہ تشکیل نو کے عمل کے بعد ڈاکٹر ایس ایم یعقوب (ناگپور) باضابطہ قومی سکریٹری آل انڈیا یونانی طبّی کانگریس کے عہدہ پر فائز ہوجائیں گے کیونکہ ان کی تقرری گزشتہ ماہ آل انڈیا یونانی طبّی کانگریس کے قومی صدر پروفیسر مشتاق احمد کرچکے ہیں۔ تمام شرکاءکا شکریہ ڈاکٹر عظیم بیگ نے ادا کیا۔
