لکھنؤ: (ایجنسی)
یوپی اسمبلی کا سرمائی اجلاس بدھ کے روز سے شروع ہو گیا۔ تین دن تک جاری رہنے والے اس اجلاس سے قبل سماجوادی پارٹی اور کانگریس کے ارکان نے مہنگائی، نظم و نسق اور اساتذہ بھرتی کے معاملے پر ایوان کے باہر اپنا احتجاج درج کرایا۔ ایوان کے پہلے دن سماجوادی پارٹی کے ارکان نے ایوان کے باہر مہنگائی، گنا قیمتوں کی ادائیگی اور اساتذہ بھرتی کے معاملہ پر مظاہرہ کیا۔ اس دوران تمام ارکان اسمبلی لال ٹوپی کے ساتھ ہر ایشو کے تعلق سے تختی لے کر کھڑے ہوئے تھے۔ اس کے بعد انہوں نے چودھری چرن سنگھ کے مجسمہ کے سامنے بیٹھ کر حکومت کے خلاف نعرے بازی کی۔
کانگریس کے ارکان نے مرکزی وزیر مملکت برائے داخلہ اجے مشرا ٹینی کے بیٹے سے وابستہ معاملہ کے حوالہ سے گاندھی کے مجسمہ پر بیٹھ کر احتجاج کیا۔ اس دوران کانگریس کے ریاستی صدر اجے کمار للو، قائد حزب اختلاف ارادھنا مونا مشرا اور ایم ایل سی دیپک سنگھ نے احتجاجی مارچ بھی نکالا۔
یہ موجودہ سترہویں اسمبلی کا آخری اور اس سال کا چوتھا سرمائی اجلاس ہے۔ اجلاس کے پہلے دن بدھ کے روز اسمبلی کی کارروائی سے قبل ایوان کے سابق اسپیکر سکھدیو راجبھر اور ملک کے پہلے چیف آف ڈفینس اسٹاف جنرل بپن راوت اور 11 دیگر افسران و اہلکار کو خراج عقیدت پیش کیا گیا۔ وہیں 16 دسمبر کو موجودہ مالی سال کا دوسرا ضمنی بجٹ، آئندہ مالی سال کا عبوری بجٹ اور 2022-23 کے ابتدائی چار مہینوں کے لئے ووٹ آن اکاؤنٹ پیش کیا جائے گا۔
تین دن کے اس مختصر اجلاس کے دوران ضروری امور پر کارروائی عمل میں لائی جائے گی۔ اس کے ساتھ ہی وزیر اعلیٰ یوگی آدتیہ ناتھ ایوان میں کچھ اہم اعلانات بھی کر سکتے ہیں۔ اسمبلی اسپیکر ہردے نارائن دیکشت نے بتایا کہ 16 دسمبر کو گرانٹس کے لیے دوسرے ضمنی مطالبات اور مالی سال 2022-23 کا بجٹ (عبوری) اور اس کے ایک حصے کے لیے ووٹ آن اکاؤنٹ ایوان میں پیش کیا جائے گا۔ سی اے جی کی رپورٹ بھی پیش کی جا سکتی ہے۔ ضمنی بجٹ 17 دسمبر کو منظور کیا جائے گا۔
