نئی دہلی نامہ نگار
جمعیۃ علماء ہند کے صدر اور بزرگ مسلم رہنما مولانا سید ارشد مدنی نے کہا کہ سعودی عرب میں تبلیغی جماعت پر پابندی کی خبریں بے بنیاد اور من گھڑت ہیں ،ہندوستانی میڈیا غلط خبریں پھیلا رہا ہے ،میری معلومات کے مطابق ایسا کچھ نہیں ہے۔
مولانا قاری محمد عثمان منصور پوری کی حیات وخدمات پر ہفت روزہ الجمعیۃ کے خصوصی نمبر کے اجراء کے بعد میڈیا سے گفتگو کرتے ہوئے ایک سوال کے جواب میں موصوف نے پر زور انداز میں کہا کہ ہندوستان کی وہ پارٹیاں یا لوگ جن کے دل میں مسلمانوں کے خلاف زہر بھرا ہوا ہے وہ ہی یہ بات کہہ رہے ہیں،جماعتیں وہاں کے لیے نکل رہی ہیں ،ہندوستان سے بھی گئی ہیں ،پابندی سے متعلق جھوٹ بولا جارہا ہے۔
خطبہ میں تبلیغی جماعت کے بارے میں قابل اعتراض باتیں کہے جانے کا دفاع کرتے ہوئے حضرت مولانا نے کہا خطبہ میں اپنی ضرورتوں کے مطابق گفتگو کرنا ان کاحق ہے۔وہ سمجھتے ہیں کہ یہ چیز ایسی ہونی چاہیے اسی کو بتارہے ہیں اس میں غلط کیا ہے۔
سعودی سفیر کو دیے گئے خط پر انہوں نے بتایا کہ ان سے یہ کہا گیا کہ جو کچھ سامنے آیا ہے وہ شر کے دروازے کھولنے والی چیزہے ،آپ ہمارا تاثر متعلقہ اتھارٹی تک پہنچا دیں۔ اس موقع پر وزارت شئون اسلامیہ کا ہندوستانی نمائندہ بھی شریک گفتگو تھا۔انہوں نے بھرپور تعاون کا وعدہ کیا ،ابھی خط کا جواب نہیں آیا ہے۔
