اسلام آباد: (ایجنسی)
پاکستانی دفتر خارجہ کے ترجمان عاصم افتخار نے بتایا کہ ہندوستان کی ریاست اتراکھنڈ میں انتہاپسند ہندؤوں کی جانب سے ایک مذہبی اجتماع میں مسلمانوں کی نسل کشی سے متعلق نفرت آمیز تقریر پر تحفظات کے بعد ہندوستانی سفارت خانے کے ناظم الامور کو طلب کیا گیا۔انہوں نے بتایا کہ ہندوستانی سفارت خانے کے ناظم الامور کو دفتر خارجہ طلب کر کے احتجاج ریکارڈ کرایا گیا۔ ان کا کہنا تھا کہ ہندوستانی ناظم الامور کو بتایا گیا کہ نئی دہلی کو پاکستانی تحفظات سے آگاہ کرے۔
پاکستانی دفتر خارجہ کے ترجمان نے کہا کہ ہندوستانی حکومت نے مسلمان کو خلاف نفرت انگیز تقاریر کرنے والے ہندتوا کے حامیوں کے خلاف کوئی کارروائی نہیں کی۔عاصم افتخار نے کہا کہ ہندوستان میں بی جے پی، آر ایس ایس حکومت میں مسلمانوں کے خلاف زہریلا پروپیگنڈہ معمول بن چکا۔ایک سرکاری بیان میں پاکستان کی وزارت نے کہا کہ آج ہندوستانی سفارتکار کو وزارت خارجہ، اسلام آباد میں طلب کیا گیا اور ان سے کہا گیا کہ ہندوستانی مسلمانوں کی نسل کشی کے لیے ہندوتوا کے حامیوں کی طرف سے وہ بڑے پیمانے پر رپورٹ ہونے والی کھلی کالوں پر حکومت پاکستان کی حکومت ہند کو اپنی شدید تشویش سے آگاہ کریں۔ ہندوستان کے چارج ڈی افیئر ایم سریش کمار کو پاکستانی حکام نے پیر کی سہ پہر طلب کیا۔اگرچہ وزرات خارجہ کے تنقیدی بیانات عام ہیں لیکن ہندوستان میں اقلیتوں سے متعلق واقعات کے بارے میں ہندوستانی سفارت کاروں کو طلب کرنا عام نہیں ہے۔
درحقیقت عام طور پر ہندوستان نے ماضی میں پاکستان میں ہندوؤں اور سکھوں کے خلاف مظالم پر متعدد تنقیدی بیانات جاری کیے ہیں اور پاکستان کے سفارت کاروں کو طلب کیا ہے۔ حال ہی میں اگست میں پاکستان میں پنجاب کے دیہی علاقے رحیم یار خان میں ایک ہندو مندر پر حملے کے خلاف ہندوستان نے اس طرح سے احتجاج درج کرایا تھا۔17 سے 19 دسمبر تک منعقد ہونے والے ہریدوار کے پروگرام میں، غازی آباد کے ڈاسنا مندر کے پجاری یتی نرسنگھا نند نے متنازعہ بیان دیتے ہوئے مسلمانوں کے خلاف جنگ کا مطالبہ کرتے ہوئے ہندوؤں سے ہتھیار اٹھانے کی اپیل کی تھی۔ متنازعہ پجاری پر یو پی میں پہلے سے کئی ایف آئی آر درج ہے اور وہ اس قسم کے متنازع بیان دینے کے لیے جانا جاتا ہے۔
دہلی بی جے پی کے سابق ترجمان اشونی اپادھیائے ان لوگوں میں شامل ہیں جنہوں نے اس تقریب میں شرکت کی تھی۔ملک گیر احتجاج کے بعد نفرت انگیز تقاریر کے سلسلے میں تین افراد کے خلاف مقدمہ درج کیا گیا ہے۔ سوامی دھرم داس، سادھوی اناپورنا اور وسیم رضوی جس نے ہندو مذہب اختیار کرنے کے بعد جتیندر نارائن سنگھ تیاگی نام رکھا ہے، کو گزشتہ جمعرات کو درج کی گئی ایف آئی آر میں نامزد کیا گیا ہے۔ایف آئی آر آئی پی سی کی دفعہ 153 اے (مذہب، نسل، جائے پیدائش، رہائش، زبان کی بنیاد پر مختلف گروہوں کے درمیان دشمنی کو فروغ دینا) کے تحت درج کی گئی ہے۔پاکستان کی وزارت خارجہ نے کہا کہ ہندوستان کے لیے یہ انتہائی قابل مذمت بات ہے کہ نہ تو منتظمین نے کوئی افسوس کا اظہار کیا اور نہ ہی ہندوستانی حکومت نے اس کی مذمت کی۔ ان کے خلاف بھی کوئی کارروائی نہیں کی گئی۔
دفتر خارجہ نے کہا کہ مسلمانوں کے خلاف تشدد کے متواتر واقعات نے اسلام کے بارے میں خوف کے بڑھتے ہوئے رجحان کو بے نقاب کیا ہے اور ہندوستان میں مسلمانوں کے مستقبل کے بارے میں ایک خوفناک تصویر کھینچی ہے۔بیان میں یہ بھی کہا گیا ہے کہ ہندوستانی فریق کو آگاہ کیا گیا ہے کہ مبینہ نفرت انگیز تقاریر کو سول سوسائٹی اور پاکستان اور دنیا بھر کے لوگوں کے کی طرف سے شدید تشویش کے ساتھ دیکھا گیا ہے۔یہ دعوی کرتے ہوئے کہ اقلیتوں، خاص طور پر مسلمانوں کے خلاف زہریلا بیانیہ… ایک معمول بن گیا ہے، پاکستان نے کہا کہ وہ توقع کرتا ہے کہ ہندوستان ان نفرت انگیز تقاریر کی تحقیقات کرے گا اور مستقبل میں ایسے واقعات کو دوبارہ ہونے سے روکنے کے لیے اقدامات کرے گا۔
