استنبول:(ایجنسی)
ترک صدر رجب طیب اردوگان نے تین دسمبر پیر کے روز بتایا کہ وہ آئندہ ماہ سعودی عرب کا دورہ کرنے والے ہیں۔ سعودی شہنشاہیت کے سخت ترین ناقد سعودی صحافی جمال خاشقجی کے استنبول میں سعودی عرب کے قونصل خانے میں 2018 میں قتل کے بعد یہ اردوگان کا ریاض کا پہلا سرکاری دورہ ہو گا۔
طیب اردوگان نے سوشل میڈیا پر اپنی ایک ویڈیو پوسٹ میں کہا، ’ میں فروری میں سعودی عرب کا دورہ کرنے والا ہوں۔‘
اردوگان کا دورہ اتنا اہم کیوں ہے؟
سعودی عرب اور ترکی کے درمیان مسلم دنیا میں بالادستی حاصل کرنے کی کوششوں کے حوالے سے طویل تاریخ موجود ہے تاہم ان دونوں سنی مسلم ممالک کے درمیان تعلقات اس وقت زیادہ کشیدہ ہو گئے جب ترک شہر استنبول میں واقع سعودی سفارت خانے میں واشنگٹن پوسٹ سے وابستہ سعودی صحافی جمال خاشقجی کو 2018ء میں قتل کر دیا گیا تھا۔ جمال خاشقجی سعودی حکومت کے سخت ناقد تھے۔
سعودی شہری جمال خاشقجی کے قتل اور پھر ان کی لاش کے ٹکڑے ٹکڑے کیے جانے کے بعد ترکی اور سعودی عرب کے درمیان تعلقات میں سرد مہری کا دور شروع ہوا۔ اس وقت، ترک صدر نے اپنے ایک بیان میں کہا تھا کہ 59 سالہ صحافی جمال خاشقجی کو قتل کرنے کا حکم سعودی حکومت میں ’اعلیٰ ترین سطح‘ سے آیا تھا۔
تاہم طیب اردوگان نے ولی عہد شہزادہ محمد بن سلمان کا نام کھل کر نہیں لیا تھا، جو فی الوقت سعودی عرب کے حقیقی حکمران ہیں۔ انقرہ کی اس تنقید کے جواب میں سعودی عرب نے ترکی کی درآمدات کا غیر سرکاری طور پر بائیکاٹ شروع کرنے کا فیصلہ کیا اور سعودی شہریوں سے ترکی کے سفر سے گریز کرنے کا بھی مطالبہ کیا گیا۔
ترک معیشت کے لیے تیل کی دولت سے مالا مال سعودی مملکت کا دباؤ ایک ایسے برے وقت پر آیا، جب ملک مہنگائی کی ریکارڈ توڑ سطح کا سامنا کر رہا ہے۔
