دہرا دون :(ایجنسی)
اتر پردیش کے بعد اتراکھنڈ میں بھی کانگریس نے 15 دنوں کے لیے سبھی بڑی انتخابی ریلیوں کو ملتوی کرنے کا اعلان کر دیا ہے۔ اتراکھنڈ میں کانگریس پارٹی نے قومی جنرل سکریٹری پرینکا گاندھی کا انتخابی دورہ بھی رد کر دیا ہے۔ دراصل پارٹی کی طرف سے پرینکا گاندھی 9 جنوری کو گڑھوال اور کماؤں ڈویژن میں ایک ایک جلسہ عام کو خطاب کرنے والی تھیں، لیکن پارٹی نے کورونا وبا کو دیکھتے ہوئے آئندہ 15 دنوں تک ریاست میں سبھی بڑی ریلیوں کو ملتوی کرنے کا فیصلہ کیا ہے۔ اتراکھنڈ میں کورونا مریضوں کی تعداد تیزی سے بڑھ رہی ہے، اس لیے یہ قدم اٹھایا گیا۔
اتراکھنڈ کے کانگریس ریاستی صدر گنیش گودیال کے مطابق کورونا انفیکشن کے بڑھتے پھیلاؤ کو دیکھتے ہوئے شری نگر (گڑھوال) اور الموڑا میں ہونے والا جلسہ ملتوی کر دیا گیا ہے۔ اس سلسلے میں کانگریس کے تنظیمی جنرل سکریٹری کے سی وینوگوپال نے کہا کہ کانگریس پارٹی نے آئندہ 15 دن کے لیے میگا ریلی پر فی الحال روک لگا دی ہے۔ اتر پردیش کے بعد اتراکھنڈ میں بھی آئندہ 15 دن تک کانگریس پارٹی کوئی بڑا پروگرام نہیں کرے گی۔ زندگی قیمتی ہے، ہمارے لیے زندگی بہت اہم ہے۔
دیگر انتخابی ریاستوں کو لے کر انھوں نے کہا کہ انچارج اور ریاستی صدور سے اس سلسلے میں رپورٹ مانگی گئی ہے۔ جیسے ہی ریاستوں کے انچارج اس سلسلے میں اپنی رپورٹ دیں گے، پارٹی آگے کی منصوبہ بندی پر فیصلہ لے گی۔
واضح رہے کہ اب تک کانگریس کے بڑے لیڈروں میں صرف پارٹی کے سابق صدر راہل گاندھی ہی ہیں جن کی ریلی اتراکھنڈ میں ہو سکی ہے۔ 16 دسمبر کو دہرادون کے پریڈ گراؤنڈ میں راہل گاندھی نے جلسہ عام سے خطاب کیا تھا۔ اس کے بعد پرینکا گاندھی کی 9 جنوری کی ریلی کو 30 دسمبر کو ہلدوانی میں ہوئی بی جے پی کی طرف سے وزیر اعظم نریندر مودی کی ریلی کا جواب مانا جا رہا تھا۔
اس سے قبل بدھ کو اتر پردیش میں کانگریس پارٹی کی جانب سے چلائی جا رہی ’لڑکی ہوں، لڑ سکتی ہوں‘ مہم کو بھی فی الحال ملتوی کر دیا گیا تھا۔ کانگریس کی جنرل سکریٹری پرینکا گاندھی نے بڑھتے کورونا معاملوں کو دیکھتے ہوئے میراتھن دوڑ روکنے کا فیصلہ لیا۔ کانگریس پارٹی کی میراتھن لکھنؤ، بریلی، کانپور اور نوئیڈا سمیت کئی اضلاع میں مجوزہ تھیں۔ 5 جنوری کو اعظم گڑھ میں، 6 جنوری کو بنارس میں، 7 جنوری کو کانپور، 8 جنوری کو پریاگ راج و نوئیڈا میں میراتھن کا انعقاد کیا جانا تھا اور اتر پردیش کے دیگر اضلاع میں کانگریس کی ’لڑکی ہوں، لڑ سکتی ہوں‘ میراتھن کی تیاریاں کی جا رہی تھیں۔
دوسری طرف اتر پردیش کے وزیر اعلیٰ یوگی آدتیہ ناتھ کی بھی نوئیڈا میں ہونے والی انتخابی ریلی کو کورونا کیس بڑھنے کے سبب رد کر دیا گیا ہے۔ انہی اسباب سے سماجوادی پارٹی سربراہ اکھلیش یادو کی ’وجے رتھ یاترا‘ بھی رد کر دی گئی جو کہ 7، 8 اور 9 جنوری کو اتر پردیش میں ہونے والی تھی۔
