پٹنہ :(ایجنسی)
بہار میں ایک بار پھر حکومت بدلے گی؟ جے ڈی یو کے ساتھ مل کر آر جے ڈی ایک بار پھر حکومت بنانے جا رہی ہے؟ یہ سوالات اچانک اس لیے پیدا ہوئے ہیں کیونکہ ریاست کی اہم اپوزیشن پارٹی نے نتیش کمار کو ذات پر مبنی مردم شماری کو بنیاد بنا کرنتیش کمار کو پھر ساتھ آنے کا آفر دے دیاہے ۔ اتنا ہی نہیں پارٹی نے یہاں تک کہہ دیا ہے کہ موسم خزاں (پت جھڑ )کے بعد بہار کی سیاست میں بڑا بھونچال آنے والا ہے۔
آر جے ڈی کے ریاستی صدر جگدانند سنگھ نے جمعرات کو ایک پریس کانفرنس میں کہا کہ نتیش کمار کو ذات پر مبنی مردم شماری کے وعدے کے ساتھ آگے بڑھنا چاہئے اور اگر کوئی وزیر (بی جے پی کوٹے سے) ان کی بات نہیں مانتا ہے تو اسے ہٹا دیا جانا چاہئے۔ انہوں نے یہ بھی کہا کہ اگر حکومت کے سامنے کوئی بحران آتا ہے تو آر جے ڈی حمایت کے لیے تیار ہے۔آر جے ڈی کے ریاستی صدر نے جو باتیںاشاروں میں کہیں اسے پاٹی کے ترجمان نے بعد میں میڈیا کے سامنے آکر واضح کیااور کہاکہ تیجسوی یادو نتیش جی کا ساتھ دینے کےلیے تیار ہے اورپت جھڑ کے بعد بہار میں بڑا بھونچال آنےوالاہے۔
آر جے ڈی کے ترجمان مرتیونجے جھا نے آج تک کو بتایا، ’یہ نتیش کمار جی کے لیے ایک کھلا پیغام ہے۔ جو اہم مسائل بہار کے مفاد میں ہیں، بہار کے 12 کروڑ عوام کا حق، خصوصی درجہ اور ذات پر مبنی مردم شماری، اس پر وزیر اعلیٰ کو اپنے موقف سے پیچھے نہیں ہٹنا چاہیے۔ تیجسوی یادو نے یہ پیغام دیا ہے۔
انہوں نے مزید کہا کہ ’’اگر کوئی کابینہ وزیر وزیر اعلیٰ کے کسی فیصلے کی مخالفت کرتا ہے تو اسے ہٹا دیا جائے، وزیر اعلیٰ، اگر آپ کو لگتا ہے کہ بی جے پی آپ کے فیصلے میں رکاوٹ بن رہی ہے، بی جے پی بہار کو جائز حقوق دلانے میں رکاوٹ ہے، تو آپ فیصلہ کریں۔ آپ کے ساتھ آر جے ڈی اور مہاگٹھ بندھن کھڑی ہے۔
کیا ایک بار پھر آر جے ڈی-جے ڈی یو کے ساتھ مل کر حکومت بنائے گی؟ اس پر آر جے ڈی کے ترجمان نے کہا، ’’یہ زیادہ حیران کن نہیں ہونا چاہیے۔ ہم نے نتیش جی کے ساتھ مل کر حکومت چلائی ہے۔ ڈبل انجن میں کوئی فائدہ نہیں اور اگر اس معاملے پر بی جے پی کا موقف مختلف رہا تو پرت جھڑ کے بعد بہار میں سیاسی بھونچال آئے گا، بڑا کھیل ہو گا، اس سے انکار نہیں کیا جا سکتا۔ آر جے ڈی نے یہ پیغام دیا ہے۔ نتیش کمار بھی گہرائی سے سوچ رہے ہیں۔
آر جے ڈی کے ترجمان نے کہا، ’’وزیر اعلیٰ مردم شماری کے لیے تیار ہیں، لیکن بی جے پی اس سے متفق نہیں ہے۔ اس لیے وزیر اعلیٰ کو پیغام ہے کہ آپ فیصلہ کریں، ہم آپ کے ساتھ کھڑے ہیں۔ تیجسوی جی کا کھلا پیغام ہے۔ یہ فیصلہ عوام کے مفاد میں کیا گیا ہے۔ اگر بی جے پی بہار کی ترقی میں رکاوٹ ہے تو انہیں پیچھے چھوڑ دینا چاہیے اور بہار کی ترقی کے لیے نتیش کمار کے ساتھ آر جے ڈی اور مہاگٹھ بندھن ہے۔
