چنڈی گڑھ :(ایجنسی)
عام آدمی پارٹی پنجاب میں سب سے بڑی پارٹی بن کر ابھر رہی ہے۔اے بی پی -سی- ووٹرسروےکےمطابق 117 سیٹوں والی پنجاب اسمبلی میں ’آپ‘ کو 52 سے 58 سیٹیں ملنے کا امکان ہے۔ اس کے علاوہ حکمراں کانگریس پارٹی صرف37 سے 42 سیٹوں پر ہی سمٹ سکتی ہے۔ تاہم، عام آدمی پارٹی اکثریت سے قریبی فرق سے چوکتی نظر آرہی ہے۔ ریاست میں اقتدار کےلیے جادوائی تعداد حاصل کرنے کو کسی بھی پارٹی کے لیے 59 سیٹیں ملنا ضروری ہے، لیکن ایک 7 سے ایک سیٹ تک کے فرق سےعام آدمی پارٹی چوکتی نظر آرہی ہے ۔ وہیں بی جے پی کیپٹن امریندر سنگھ اور ڈھینڈسا کے اتحاد کو صرف ایک سیٹ ملنے کی پیش گوئی کی گئی ہے۔
یہی نہیں ووٹ فیصد کے لحاظ سے بھی عام آدمی پارٹی کو بڑی برتری حاصل ہوتی دکھائی دے رہی ہے۔ سروے کے مطابق، اے اے پی کو ریاست میں 40 فیصد ووٹ مل سکتے ہیں، جب کہ کانگریس کو 36 فیصد ووٹ مل سکتے ہیں۔ 2017 تک اقتدار میں رہنے والی اکالی دل کو اس بار صرف 18 فیصد ووٹ ملنے کی امید ہے۔ اس کے ساتھ ہی پی ایم نریندر مودی کی سیکورٹی میں چوک کی وجہ سے سرخیوں میں آنے والی بی جے پی کو صرف 2 فیصد ووٹ ملنے کا اندازہ ہے۔ اگر یہ اوپینین پول صحیح ثابت ہوتی ہے تو اکالی دل کے ساتھ ساتھ بی جے پی، کانگریس کو بھی بڑا جھٹکا لگے گا۔ کیپٹن امریندر سنگھ کے پارٹی چھوڑنے کے بعد کانگریس کو بہت امیدیں ہیں، چرنجیت سنگھ چننی وزیراعلیٰ بنے اور نوجوت سنگھ سدھو کو ریاستی صدر بنایا گیا۔
ایسے میں سروے کے نتائج ان کی پریشانیوں میں اضافہ کرنے والے ہیں۔ پنجاب میں عام آدمی پارٹی نے 2017 میں 20 سیٹیں جیت کر سب کو حیران کر دیاتھا۔ کانگریس نے ریاست میں 77 سیٹوں کے ساتھ اقتدار حاصل کیا تھا، جب کہ’آپ‘ کو ریاست میں اہم اپوزیشن پارٹی بننے کا موقع ملا۔ اب سروے میں عام آدمی پارٹی اقتدار جیتنے کی طرف بڑھتی نظر آ رہی ہے۔ اگر ایسا ہوتا ہے تو عام آدمی پارٹی جو پچھلے کئی سالوں سے دہلی سے باہر نکلنے کی کوشش کر رہی ہے، کو بڑی راحت ملے گی۔ غور طلب ہے کہ پنجاب میں دہلی کے سی ایم اروند کیجریوال نے خود انتخابی مہم کی ذمہ داری سنبھالی ہے اور سینئر لیڈر راگھو چڈھا کو پنجاب کا انچارج بنایا گیا ہے۔
عام آدمی پارٹی کو پنجاب کے سروے میں برتری حاصل کرنے کی بڑی وجہ مالوا میں کامیابی ہے۔ سروے کے مطابق ریاست کے مالوا میں عام آدمی پارٹی کو 39 سے 43 سیٹیں مل سکتی ہیں۔ اس خطہ میں کل 69 سیٹیں ہیں جن میں سے کانگریس کو محض 13 سے 17 پر قناعت کرنا پڑ سکتا ہے۔ دوسری طرف اکالی دل کو یہاں 10 سے 14 سیٹیں ملنے کی امید ہے۔ بی جے پی اتحاد کو صفر سے 2 سیٹیں مل سکتی ہیں۔
اس کے علاوہ 23 سیٹوں والے دوآبہ ریجن میں’آپ‘کو 7 سے 11 سیٹیں، کانگریس کو 7 سے 11 سیٹیں ملنے کا اندازہ لگایا گیا ہے۔ اکالی دل کو یہاں 2 سے 6 اور بی جے پی کو صرف ایک سیٹ ملنے کی امید ہے۔ اس کے علاوہ مانجھا کی 25 سیٹوں میں سے کانگریس 14 سے 18 سیٹیں حاصل کرکے سب سے بڑی پارٹی بن سکتی ہے۔ لگتا ہے آپ کو یہاں صرف 3 سے 7 سیٹیں مل رہی ہیں۔ اس طرح مالوا آپ کا گڑھ بنتا دکھائی دے رہا ہے۔
