نئی دہلی:(ایجنسی)
اتر پردیش میں اسمبلی انتخابات کے پیش نظر منگل کو یہاں بھارتیہ جنتا پارٹی (بی جے پی) کی ایک اہم میٹنگ ہو رہی ہے اس میٹنگ میں مرکزی وزیر داخلہ امت شاہ، اترپردیش کے وزیر اعلیٰ یوگی آدتیہ ناتھ، دونوں نائب وزیر اعلیٰ کیشو پرساد موریہ، دنیش شرما، اتر پردیش بی جے پی کے الیکشن انچارج دھرمیندر پردھان، بی جے پی کے تنظیمی جنرل سکریٹری بی ایل سنتوش، اتر پردیش کے صدر سواتنتر دیو سنگھ ، اترپردیش میں تنظیمی سکریٹری سنیل بنسل سمیت کئی رہنما شامل ہیں ۔ذرائع کے مطابق اس میٹنگ میں انتخابی حکمت عملی پر غور کیا جا رہا ہے۔ ساتھ ہی پہلے دو مرحلوں کی سیٹوں کے لیے پارٹی کے ممکنہ امیدواروں کے ناموں پر غوروخوض کیا جا رہا ہے۔
میٹنگ میں یہ بھی فیصلہ ہو سکتا ہےکہ قانون ساز کونسل کے رکن یوگی آدتیہ ناتھ، کیشوپرساد موریہ اور ڈاکٹردنیش شرما اس بار اسمبلی الیکشن لڑیں گے یا نہیں۔ اگر یہ رہنما الیکشن لڑتے ہیں تو کس سیٹ سے الیکشن لڑیں گے؟
مانا جا رہا ہے کہ اس بار الیکشن میں کئی موجودہ اراکین اسمبلی کے ٹکٹ بھی کٹ سکتے ہیں۔ قابل ذکر ہے کہ کل لکھنؤ میں اتر پردیش بی جے پی کے دفتر میں ایک میٹنگ ہوئی جس میں انتخابی حکمت عملی پر تبادلہ خیال کیا گیاتھا۔
