لکھنؤ :(ایجنسی)
اتر پردیش میں آنے والے اسمبلی انتخابات کے پیش نظر سیاسی پارٹیوں نے اتحادیوں کے ساتھ سیٹ شیئرنگ کا منصوبہ تیار کرنا شروع کر دیا ہے۔ دریں اثنا، خبر ہے کہ بدھ کو سماج وادی پارٹی اور ان کی اتحادی جماعتوں کے درمیان سیٹ شیئرنگ فارمولہ طے پا گیا ہے، حالانکہ ابھی تک کوئی باضابطہ اعلان نہیں کیا گیا ہے۔ ذرائع سے ملی اطلاع کے مطابق ایس پی کے قومی صدر اکھلیش یادو کے ساتھ ہوئی میٹنگ میں اوم پرکاش راج بھر کی قیادت والی سہیل دیو بھارتیہ سماج پارٹی کو 8، شیو پال یادو کی پرگتی شیل سماج وادی کو 6، کیشو دیو موریہ کی مہان دل کو 3، سنجےچوہان کی جن وادی پارٹی کو 3 سیٹیں مل سکتی ہیں۔
دوسری طرف راشٹریہ لوک دل کو 25-30 سیٹیں ملنے کی امید ہے۔ ذرائع کا دعویٰ ہے کہ میٹنگ میں ٹی ایم سی اور این سی پی کو 1-1 سیٹیں دینے کا فیصلہ کیا گیا ہے۔ ذرائع نے بتایا کہ شیو پال کی پرگتی شیل سماج وادی پارٹی کو جن 6 سیٹوں کی پیشکش کی گئی ہے ان میں گنور، جسونت نگر، بھوجپور، جسرانہ، مبارک پور اور غازی پور کی ایک سیٹ شامل ہے۔
اتحادیوں کے ساتھ ہونے والی میٹنگ کی تصویر ٹویٹ کرتے ہوئے اکھلیش نے کہا- ‘ایس پی کی تمام حلیفوں کی اعلیٰ قیادت کے ساتھ، آج اترپردیش کی ترقی اور مستقبل کی بات ہوئی..‘‘ جبکہ شیو پال سنگھ یادو نے ٹویٹ کیا کہ- ’سماج وادی پارٹی کے قومی صدر اکھلیش یادو کی قیادت میں شامل تمام اتحادی پارٹیوں کے ساتھ آئندہ اسمبلی انتخاب کی تیاریوں پر بحث ہوئی۔ پردیش کے کروڑوں لوگوںکی یہ خواہش ہے کہ اترپردیش میں اکھلیش یادو کی قیادت میں ایس پی اتحاد کی سرکار بنے۔‘
راج بھر نے میٹنگ کی تصویریں بھی ٹویٹ کی ہیں۔ انہوں نے 10 مارچ کو اکثریت کا دعویٰ کرتے ہوئے ٹیویٹ کیا :’’ سماج وادی پارٹی کے قومی صدر اکھلیش یادو کی قیاد ت میں تمام اتحادیوں کے ساتھ انتخابی تیاریوں پر بات چیت ہوئی، پسماندہ، دلت، اقلیتی برادری ،محروم طبقے کی مخالفت بی جے پی سرکار کو رخصت کرنا ہے ۔ 10 مارچ کو ایس پی -سہیل دیو بھارتیہ سماج پارٹی سنکلپ مورچہ گٹھ بندھن سرکاربنانے کے لیے ایک ساتھ۔‘‘
