نئی دہلی:(ایجنسی)
ہیومن رائٹس واچ (HRW) نے اپنی عالمی رپورٹ 2022 میں ہندوستان میں انسانی حقوق کی خلاف ورزیوں، نفرت انگیز جرائم، سماجی کارکنوں، صحافیوں اور حکومت پر تنقید کرنے والوں کے خلاف کریک ڈاؤن پر روشنی ڈالی ہے۔
معروف قبائلی سماجی کارکن اسٹین سوامی کی حراست میں موت، تریپورہ پولیس کے ذریعہ وکلاء اور سوشل میڈیا پر اثر انداز ہونے والوں کے خلاف مقدمات، سی اے اے مخالف مظاہروں پر طلباء اور کارکنوں کو نشانہ بنانا، کسانوں کی بے عزتی، پیگاسس لائن، انٹرنیٹ کی بندش اورکشمیر میں صحافیوں کو ہراساں کرنا شامل ہیں۔ HRW کی رپورٹ میں ان جیسے امور کا تذکرہ کیا گیا ہے ۔
ہیومن رائٹس واچ کی جنوبی ایشیا کی ڈائریکٹر میناکشی گنگولی نے HRW کی طرف سے جاری کردہ ایک بیان میں کہا، ’’بی جے پی حکومت نے ایک ایسا ماحول بنایا ہے جس میں اقلیتیں خود کو غیر محفوظ محسوس کر رہی ہیں، حکمراں پارٹی کے حامیوں کے حملے کا خطرہ ہے۔‘‘
752 صفحات پر مشتمل ورلڈ رپورٹ 2022، کے 32 ویں ایڈیشن میں، HRW نے تقریباً 100 ممالک میں انسانی حقوق کے طریقوں کا جائزہ لیا ہے۔ رپورٹ میں تریپورہ میں ہندوتوا کے ہجوم کے ذریعہ مسلمانوں کے گھروں اور مساجد پر حملوں کا ذکر کیا گیا ہے۔ اس نے تشدد کے خلاف بولنے والے وکلاء اور سوشل میڈیا پر اثر انداز ہونے والوں کے خلاف ریاستی پولیس کی کارروائی کی مذمت کی ہے۔
’’تریپورہ پولیس نے اکتوبر میں فرقہ وارانہ تشدد کی حقائق تلاش کرنے کی تحقیقات کرنے کے لیے چار وکلاء کے خلاف نومبر میں دہشت گردی کے مقدمات درج کیے اس تشدد میں ہندو ہجوم نے مساجد اور مسلمانوں کی املاک پر حملہ کیاتھا ۔ رپورٹ میں کہا گیا کہ پولیس نے 102 سوشل میڈیا اکاؤنٹس کے خلاف دہشت گردی کے مقدمات بھی درج کیے اور تشدد کی رپورٹنگ کرنے والے دو صحافیوں کو ‘فرقہ وارانہ انتشار پھیلانے کے الزام میں حراست میں لیا۔‘‘
رپورٹ میں مزید کہا گیا کہ حکام نے شہریت کے قانون میں ترمیم کے خلاف احتجاج کرنے پر انسداد دہشت گردی اور بغاوت کے قوانین سمیت متعدد طلباء اور کارکنوں کے خلاف الزامات عائد کرنے کا سلسلہ جاری رکھا۔
رپورٹ میں بی جے پی حکومت کی مناسب طبی سہولتیں فراہم کرنے میں ناکامی کی بھی مذمت کی گئی ہے، جس کی وجہ سے کووڈ- 19 کے دوران ہزاروں افراد کی موت ہوئی تھی۔
