لکھنؤ :(ایجنسی)
ایس پی سربراہ اکھلیش یادو نے پہلے ہی یوپی الیکشن لڑنے کا فیصلہ کر لیا تھا۔ اب خبر ہے کہ اکھلیش یادومین پوری کی کرہل سیٹ سے الیکشن لڑیں گے۔ اب تک قیاس آرائیاں کی جا رہی تھیں کہ اکھلیش اعظم گڑھ کے گنور سے انتخابی میدان میں اتر سکتے ہیں، لیکن آج ان تمام قیاس آرائیوں کو ختم کرتے ہوئے سماج وادی پارٹی نے اکھلیش کی سیٹ کا اعلان کر دیا۔
بتا دیں کہ پارٹی کے سابق قومی صدر ملائم سنگھ یادو کا اس سیٹ سے گہرا تعلق ہے۔ ملائم سنگھ یادو نے کرہل کے جین انٹر کالج سے تعلیم حاصل کی تھی اور وہ یہاں ٹیچر بھی تھے۔ کرہل ملائم سنگھ یادو کے گاؤں سیفئی سے صرف چار کلومیٹر دور ہے۔
کرہل اسمبلی سیٹ پر سماج وادی پارٹی (ایس پی) کا سات بار قبضہ رہا ہے۔اس اسمبلی سیٹ سے 1985 میں دلت مزدور کسان پارٹی کے بابو رام یادو ،1989 اور 1991 میں سماج وادی جنتاپارٹی (ایس جے پی) اور 1993 ،1996 میں ایس پی کے ٹکٹ پر بابو رام یادو ایم ایل اےمنتخب ہوئے۔ 2000 کےضمنی انتخاب میں ایس پی کےانل یادو ،2002 میں بی جےپی اور 2007 ، 2012 اور 2017 میں ایس پی کے ٹکٹ پر سوورن سنگھ یادوایم ایل اے منتخب ہوئے۔
کرہل اسمبلی سیٹ سے 2017 کے الیکشن میں ایس پی نے سوورن سنگھ یادو پر اعتماد ظاہر کیا تھا۔ ایس پی کے ٹکٹ پر میدان میں اترے سوورن سنگھ یادو نے اپنے قریبی حریف بھارتیہ جنتا پارٹی (بی جے پی) کے راما شاکیہ کو 40 ہزار سے زیادہ ووٹوں کے بڑے فرق سے شکست دی تھی۔
دوسری طرف اتر پردیش کے انتخابات میں بھیم آرمی کے سربراہ چندر شیکھر آزاد سی ایم یوگی آدتیہ ناتھ کے خلاف میدان میں ہوں گے۔ چندر شیکھر آزاد نے اعلان کیا ہے کہ وہ گورکھپور صدر سیٹ سے سی ایم یوگی کے خلاف اسمبلی الیکشن لڑیں گے۔ اس سے پہلے 18 جنوری کو بھیم آرمی چیف نے یوپی کی 33 سیٹوں کے لیے اپنے امیدواروں کا اعلان کیا تھا۔
واضح رہے کہ اکھلیش یادو نے سال 2019 کے لوک سبھا الیکشن میں اعظم گڑھ ضلع کی گوپال پور سیٹ پر بی جے پی امیدوار اور بھوجپوری اداکار دنیش لال یادو ’نرہوا‘ کو ہرایا تھا۔ وہیں سال 2017 کے اسمبلی انتخابات کی بات کریں تو سماجوادی امیدوار کو یہاں سے زبردست جیت ملی تھی۔ سماجوادی پارٹی کے امیدوار نفیس جاوید نے اس الیکشن میں اپنے قریبی حریف بی جے پی کے شری کرشن پال کو 14,960 ووٹوں سے شکست دی تھی۔
