لکھنؤ:(ایجنسی)
اتر پردیش انتخابات کے لئے کانگریس نے اپنے امیدواروں کی دوسری فہرست جاری کر دی ہے۔ اس فہرست میں کل 41 امیدواروں کا اعلان کیا گیا ہے۔ کانگریس نے 40 فیصد خواتین کو ٹکٹ دینے کے اپنے وعدے پر ایک مرتبہ پھر عمل کرتے ہوئے اس فہرست میں 16 خواتین کو بطور امیدوار شامل کیا ہے۔
کانگریش نے جن سیٹوں سے امیدواروں کا اعلان کیا ہے اس میں شاملی، کیرانہ، تھانا بھون، مظفرنگر، میراںپور، کھتولی، سردھنا، میرٹھ، باغپت، مودی نگر، دھولانا، ڈیبائی، خورجہ وغیر کی اسمبلی سیٹیں شامل ہیں۔
دوسری فہرست میں جن خواتین کو موقع دیا گیا ہے ان میں سہارنپور سے سکھوندر کور، چرتھاول سے ڈاکٹر یاسمین رانا، تھانا بھون سے سلمیٰ آغا انصاری، بیلاری سے کلپنا سنگھ، چندوسی سے متھلیش، صاحب آباد سے سنگیتا تیاگی، مودی نگر سے نیرج کماری پرجاپتی شامل ہیں۔ اس کے علاوہ ہاپوڑ سے بھاونا والمیکی، سیانہ سے پونم پنڈت، ڈیبائی سے سونیتا شرما، اگلاس سے پریتی دھانگر، چھاتا سے پونم دیوی، مانت سے سمن چودھری، نواب گنج سے اوشا گنگوار اور اکبر پور سے پرینکا جائسوال کو موقع دیا گیا ہے۔
دوسری اہم سیٹوں کی بات کریں تو کیرانہ سے حاجی اخلاق، شاملی سے ایوب جنگ، میرانپور سے مولانا جمیل قاسمی، سردھنا سے سید رعن الدین، میرٹھ ساؤتھ سے نفیس سیفی، سکندر آباد سے سلیم اختر اور شکار پور سے ضیاء الرحمٰن کو امیدوار بنایا گیا ہے۔
