بی جے پی اتحادی اپنا دل نے عبداللہ اعظم کےخلاف حیدر علی خاں کو میدان میں اتارا

رام پور :(نامہ نگار)

بھارتیہ جنتا پارٹی کی اتحادی پارٹنر اپنا دل (ایس) نے اتوار کو حیدر علی خان کو اترپردیش اسمبلی انتخابات کے لیے رام پور ضلع کی سوار اسمبلی سیٹ سے پارٹی کا امیدوار بنایا ہے۔ خاص بات یہ ہے کہ اپنا دل کا بی جے پی کے ساتھ رسمی معاہدہ حال ہی میں ہوا ہے۔ نشستوں کی تقسیم کے حوالے سے کوئی مشترکہ اعلان نہیں کیا گیا۔ 2017 میں، اپنا دل کےحصے میں 11 سیٹیں آئی تھیں، جن میں سے اس نے 9 پر کامیابی حاصل کی تھی۔

اپنا دل (ایس) کے قومی ترجمان راجیش پٹیل نے اتوار کو حیدر علی خان کے پارٹی کے امیدوار کے طور پر سوار اسمبلی حلقہ سے امیدوار ہونے کی اطلاع دی۔ پٹیل نے کہا کہ خان نے کانگریس چھوڑنے اور ماضی میں اپنا دل (ایس) کی قیادت سے متاثر ہونے کے بعد دہلی میں پارٹی میں شمولیت اختیار کی تھی۔ کانگریس نے بھی خان کو سوار سے اپنا امیدوار بنایا تھا۔

نواب خاندان سے تعلق رکھنے والے رام پور کی سابق ایم پی بیگم نور بانو کے پوتے حیدر علی دوسرے امیدوار ہیں، جنہوں نے کانگریس کا امیدوار قرار دیے جانے کے بعد ٹکٹ سے انکار کر دیا ہے۔ حیدر علی خان کو کانگریس نے 13 جنوری کو اپنی پہلی فہرست میں سوار سے نامزد کیا تھا۔ اسی فہرست میں بیگم نور بانو کے بیٹے کاظم علی خان کو رام پور سے کانگریس کا امیدوار قرار دیا گیا ہے۔

2017 میں، عبداللہ اعظم خاں نے ایس پی کے ٹکٹ پر سوار اسمبلی حلقہ سے اسمبلی انتخابات جیتا تھا۔ رام پور سے ایس پی کے قد آور لیڈر ایم پی اعظم خاں کے بیٹے عبداللہ اعظم خاں کو حال ہی میں تقریباً دو سال بعد سیتا پور جیل سے رہا کیا گیا ہے اور وہ دوبارہ ایس پی سے الیکشن لڑنے کی تیاری کر رہے ہیں۔ الہ آباد ہائی کورٹ نے دسمبر 2019 میں عبداللہ اعظم خاں کو انتخابی حلف نامے میں تضاد کی وجہ سے بطور ایم ایل اے نااہل قرار دے دیا تھا۔ رام پور ضلع میں نواب خاندان اور اعظم خاں کے درمیان سیاسی مقابلہ آرئی ہے۔