ممبئی:(ایجنسی)
شیوسینا کے سربراہ اور مہاراشٹر کے وزیر اعلیٰ ادھو ٹھاکرے نے بی جے پی پر شدید حملہ کیا ہے۔ ادھو ٹھاکرے نے بالاصاحب ٹھاکرے کے 96ویں یوم پیدائش کے موقع پر شیوسینکوں کے ساتھ آن لائن بات چیت کی۔اس موقع پر بات کرتے ہوئے وزیر اعلیٰ ادھو ٹھاکرے نے کہا کہ بی جے پی کے ساتھ 25 سال کا اتحاد بے سود رہا۔ ہم نے ان کی پرورش کی لیکن ہمیں کیا ملا؟ شیوسینا سربراہ کہتے تھے کہ راج کرن یہ گج کرن ہے۔ بی جے پی اقتدار کے لیے ہندوتوا کا لبادہ اوڑھ رکھی ہے۔ ہم نے ہندوتوا نہیں چھوڑاہے، ہم نے بی جے پی کو چھوڑا ہے۔ بی جے پی کا مطلب ہندوتوا نہیں ہے۔
ادھو ٹھاکرے نے کہا کہ گردن کی تکلیف کی وجہ سے آپریشن کرنا پڑا، فزیو تھراپی ابھی جاری ہے۔ جلد صحت یاب ہوں گے اور دوبارہ مہاراشٹر کا دورہ کریں گے۔ دہلی میں بھی بالا صاحب کا پتلا نصب کریں گے۔ ادھو نے کہا کہ ہم نے کبھی بھی ہندوتوا کو اقتدار کے لیے استعمال نہیں کیا، جیسا کہ بی جے پی سیاسی فائدے کے لیے کرتی رہی ہے۔ ادھو ٹھاکرے نے کہا کہ ہم نے وزیر داخلہ امت شاہ کے چیلنج کو قبول کیا ہے۔ شاہ نے کہا تھا کہ شیوسینا کو اپنے بل بوتے پر الیکشن لڑنا چاہیے۔
ادھو ٹھاکرے نے کہا کہ شیوسینا اب مہاراشٹر سے باہر بھی اپنا دائرہ وسیع کرے گی اور قومی کردار میں آئے گی۔ انہوں نے کہا کہ شیوسینا نے ہندوتوا کے ایجنڈے کو آگے بڑھانے کے لیے بی جے پی کے ساتھ اتحاد کیا ہے۔ چیف منسٹر نے کہا کہ شیوسینا امت شاہ کے اپنے طور پر الیکشن لڑنے کے چیلنج کو قبول کرتی ہے۔ ادھو ٹھاکرے نے کہا، جب بی جے پی سیاسی طور پر آگے بڑھ رہی تھی، اس نے شیو سینا سمیت کئی علاقائی جماعتوں کے ساتھ اتحاد کیا۔ اس وقت کئی جگہوں پر بی جے پی کی سیکورٹی ضبط ہو جاتی تھی۔
