مظفر نگر :(ایجنسی)
سماج وادی پارٹی کے سربراہ اکھلیش یادو اور راشٹریہ لوک دل کے سربراہ جینت چودھری نے جمعہ کو مظفر نگر میں ایک پریس کانفرنس کی۔ دونوں رہنماؤں نے عوام سے اتحاد کے امیدواروں کوکامیاب بنانے کی اپیل کی۔ انہوں نے کہا کہ اتحاد کی جانب سے جو بھی وعدے کیے گئے ہیں وہ حکومت بننے پر پورے کیے جائیں گے۔
سابق وزیر اعلیٰ اکھلیش یادو نے کہا کہ سابق وزیر اعظم چودھری چرن سنگھ، مہندر سنگھ ٹکیت، ملائم سنگھ یادو اور اجیت سنگھ نے اپنے وقت کی حکومتوں کو جگایا تھا۔ انہوں نے کہا کہ اتر پردیش کا یہ انتخاب کسانوں اور نوجوانوں کے مستقبل کے لیے ہے اور تجارت و کاروبار کو آگے بڑھانے کے ساتھ ساتھ چودھری چرن سنگھ کی وراثت کو بھی آگے لے جانے کا ہے۔
اکھلیش نے کہا کہ بی جے پی کی حکومتوں نے کسانوں سے جتنے بھی وعدے کیے تھے وہ پورے نہیں ہوئے۔ انہوں نے کہا کہ کسانوں نے حکومت کو ایگریکلچر ایکٹ واپس لینے پر مجبور کردیا۔
وعدوں کو دہراتے ہوئے اکھلیش نے کہا کہ اقتدار میں آنے پر 300 یونٹ بجلی مفت دی جائے گی، آبپاشی کے لیے بجلی مفت دی جائے گی اور کسانوں کو گنے کی ادائیگی کے لیے انتظار نہیں کرنا پڑے گا، اس کا انتظام بھی ان کی حکومت کرے گی۔
لیپ ٹاپ بانٹیں گے، سماج وادی پنشن دیں گے
انہوں نے کہا کہ حکومت آنے پر لیپ ٹاپ بھی تقسیم کئے جائیں گے اور سماج وادی پنشن بھی دی جائے گی۔ اس الیکشن میں یہاں کے عوام منفی سوچ کو مسترد کر دیں گے اور سماج وادی پارٹی -راشٹریہ لوک دل کا اتحاد اتر پردیش سے بی جے پی کا صفایا کر ے گا۔
ایک سوال کے جواب میں اکھلیش نے کہا کہ وزیر اعلیٰ یوگی آدتیہ ناتھ کا ایسا سیاسی نقل مکانی بی جے پی نےکرایا کہ انہیں گھر بھیج دیا۔
اس موقع پر راشٹریہ لوک دل کے سربراہ جینت چودھری نے کہا کہ وہ تمام سرکاری ملازمین سے اپیل کرتے ہیں جنہیں پوسٹل بیلٹ کے ذریعے ووٹ دینا ہے، محتاط رہیں اور اپنا ووٹ صرف بیلٹ پیپر پر ڈالیں۔
اکھلیش نے کہا کہ وہ الیکشن کمیشن کی ہدایات پر پوری طرح عمل کر رہے ہیں۔ مظفر نگر آنے سے پہلے اکھلیش یادو نے الزام لگایا تھا کہ ان کے ہیلی کاپٹر کو دہلی میں تھوڑی دیر کے لیے روکا گیا۔
